काठमाडौं । राष्ट्रिय सभा सदस्य भगवती न्यौपानेले देशलाई पाँच दलीय गठबन्धनले चिथोर्ने काम गरिरहेको बताउनु भयो । उहाँले अर्थमन्त्रीले व्यापारीहरुका प्रतिनिधिहरुसँग बसेर बजेट बनाएको कुरामा जनता र प्रतिपक्षले छानबिन समिति बनाएर अध्ययन गर्न माग गरेपनि सरकारले त्यसलाई बेवास्ता गरिरहेको बताउनु भयो ।
उहाँले प्रधानमन्त्री शेरबहादुर देउवाको अमेरिका भ्रमणबारे जनताले जान्न चाहेको तर प्रधानमन्त्री संसद छल्ने काममा लागिपरेको आरोप लगाउनु भयो ।
राष्ट्रिय सभा सदस्य न्यौपानेले भन्नुभयो, ‘यो देशलाई सत्ता,पक्षले, पाँच दलीय गठबन्धनले, सरकारले कोपर्ने काम भएको छ । चिथोर्ने काम भएको छ । नेपाली आमालाई रगताम्य पार्ने काम भएको छ । अर्थमन्त्रीज्यूको बारेमा थुप्रै प्रश्नहरु उठे, हामीले छानबिन समिति बनाउनुहोस् भनेका छौँ । बजेट निर्माणको सम्बन्धमा अनाधिकृत व्यक्तिहरुलाई राखेर बजेट बनाइयो भन्ने विषय धेरै उठ्यो । जनताले भने । हामीलाई तपाईले ढाँट्न स्क्नुहोला, तर प्रविधिलाई ढाँट्न सक्नुहुन्न, त्यसैले सिसिटिभी फूटेज देखाइयोस् भन्यौँ । छानबिन समिति गठन गरियोस् भन्दा के गल्ती भयो ? फेरि पनि म भन्न चाहन्छु छानबिन समिति गठन गरियोस् ।
अहिले प्रधानमन्त्रीज्यूसम्बन्धित धेरै प्रश्न उठका छन्, तर प्रधानमन्त्रीज्यू प्रतिनिधि सभामा मान्यज्यूहरुले धेरै कुरा उठाउनुभएको छ । तर उहाँ जवाफ दिन आउनुहुन्न । सदनलाई छल्नुहुन्छ । संस्कृति मन्त्रीले संस्कार सिकाउनुपर्ने हो । उहाँले बोल्दै गर्दा अहिले कान थुन्नुपर्ने अवस्था छ । अश्लील शब्द बोलेको अडियो सार्वजनिक हुँदापनि यो सरकार मौन रहन्छ ।’
राष्ट्रिय सभा सदस्य न्यौपानेले संस्कार सिकाउने संस्कृति मन्त्रीले सुन्नै नसकिने कुराहरु बोलेको भन्दै आपत्ति जनाउनु भयो । उहाँले संस्कृति, पर्यटन तथा नागरिक उड्डयन मन्त्री प्रेमबहादुर आलेले अश्लील शब्द प्रयोग गरेको अडियो सार्वजनिक हुँदापनि सरकार मौन रहेको भन्दै आपत्ति जनाउनु भयो ।
