काठमाडौँ । प्रतिनिधिसभा, अन्तर्राष्ट्रिय सम्बन्ध समितिले प्रधानमन्त्री शेरबहादुर देउवालाई समितिको बैठकमा अनुपस्थित हुनुको कारण सोध्ने निर्णय गरेको छ ।
समितिको आइतबार बसेको बैठकले अमेरिकाको स्टेट पार्टनरसीप प्रोग्राम (एसपीपी) का साथै आसन्न अमेरिका भ्रमणबारे छलफल गर्न प्रधानमन्त्री देउवालाई आइतबारको बैठकमा बोलाए पनि प्रधानमन्त्री समितिको बैठकमा उपस्थित हुनुभएन ।
बैठकले प्रधानमन्त्रीलाई बैठकमा आउन नसक्नुका कारण के हो जानकारी गराउन ध्यानाकर्षण गराउने निर्णय गरेको छ । प्रधानमन्त्रीको सचिवालयले आइतबारको बैठकमा अन्तिम समयमा प्रधानमन्त्री उपस्थित हुन नसक्ने जानकारी गराएको थियो ।
यद्यपि समितिको बैठकमा प्रधानमनत्रीलाई उपस्थित गराउने वा नगराउने बारेमा समितिका सदस्यहरुबीच नोकझोक भएको थियो । विशेषगरी नेपाली कांग्रेसका सांसदहरुले प्रधानमन्त्रीलाई समितिमा आउन नसक्नुको कारण माग्ने निर्णयप्रति आपत्ति जनाएका थिए ।
