काठमाडौं । प्रतिनिधिसभाका अन्तर्राष्ट्रिय सम्बन्ध समितिमा प्रधानमन्त्री शेरबहादुर देउवा अनुपस्थित भएको बिषयमा सदस्यहरुबीच नोकझोक भएको छ ।
प्रधानमन्त्रीलाई उपस्थित हुन पुनः पत्र पठाउने बिषयमा पत्रको आशय र मनासायका बिचमा सासंदहरु बीच विवाद भएको हो ।
बैठकमा समितिका सभापति पवित्रा खरेल निरौलाले समितिको बैठकमा प्रधानमन्त्रीलाई बोलाएर बदनाम गर्न नखोजिएको बताउनु भएको थियो ।
उहाँले भन्नुभयो ‘उहाँलाई हामीले अपमान गर्ने, उहाँलाई स्पष्टीकरण लिने, उहाँलाई बदनाम गर्ने, तुच्छ वचन बोल्ने त्यो होइन । हामी सम्मान गर्छौं, हिजो पनि हामीले प्रधानमन्त्री जुनसुकै पार्टीको सम्मान गरेका थियौं, आज पनि गर्छौं, भोलि पनि गर्छौं ।’
सभापति खरेलले एमसीसी जस्तै एसपीपी पनि व्याख्यात्मक घोषणासहित पास गर्न खोजिएको त होइन भनेर प्रश्न उठेकाले प्रधानमन्त्री शेरबहादुर देउवालाई समितिमा बोलाउनु परेको बताउनु भयो ।
उहाँँले अमेरिकी स्टेट पार्टनसिप प्रोग्राम (एसपीपी)का र प्रधानमन्त्रीको आसन्न अमेरिकाको भ्रमणसन्दर्भमा छलफल गर्न बोलाएपनि अन्तिम समयमा प्रधानमन्त्रीको सचिवालयले उपस्थित हुन नसक्ने जानकारी प्राप्त भएको जानकारी गराउनु भयो ।
