काठमाडौँ । सदन कारवाहीको सामान्य नियम उल्लघंन गर्दा सभामुख अग्निप्रसाद सापकोटाले एक मन्त्रीलाई सबक सिकाएका छन् ।
शुक्रबार प्रतिनिधिसभाको बैठकमा लोकतान्त्रिक समाजवादी पार्टी (लोसपा) का सांसद एकवाल मियाले बोलिरहेको समयमा खानेपानी मन्त्री उमाकान्त चौधरीले सदनको कारवाहीको मर्यादा उल्लघंन गरेका थिए ।
मन्त्री चौधरी सांसद मियाले बोलिरहँदा बैठक प्रवेश गरेका थिए । त्यसपछि सभामुख सापकोटाले बोलिरहेका मियालाई बोल्न रोकेर बैठक प्रवेश गरिरहेका मन्त्री चौधरीलाई घुमेर आउन निर्देशन दिएका थिए ।
त्यसपछि मन्त्री बस्ने कुर्सीमा पुगिसकेका मन्त्री चौधरी फर्केर सभामुख बस्ने बायाँतर्फको ढोकाबाट संसद् बैठक प्रवेश गरेका थिए ।
सदनमा कुनै सदस्यले बोलिरहेको समयमा सभामुख र सदस्यको बीचबाट बाटो काट्न वा सभामुखलाई पिठ्युँ देखाएर प्रवेश गर्न नपाइने प्रतिनिधिसभा नियमावलिमा व्यवस्था छ ।
सभामुख सापकोटाले नेपाली कांग्रेसका मन्त्री चौधरीलाई त्यस्तो निर्देशन दिएपछि नेकपा (एमाले) का सांसदहरुले टेबल ठोकेर समर्थन जनाएका थिए ।
