काठमाडौं । युरोपियन क्लब फुटबलको सर्वाधिक चर्चित एवं प्रतिष्ठित फुटबल लिग युइएफए च्याम्पियन्स लिगको नयाँ सिजन २०२१–२२ आज (मंगलबार) देखि सुरु हुँदैछ ।
पहिलो दिन समूह चरणको विभिन्न ८ खेलमा प्रतिस्पर्धा हुनेछ ।
आज राति समुह ‘ई’, समूह ‘एफ’, समूह ‘जी’ र समूह ‘एच’ का टिमहरुले प्रतिस्पर्धा गर्दैछन् ।
समूह ‘एफ’मा स्वीट्जरल्यान्डको योङ ब्वाइजले घरेलु मैदानमा इंग्लिस क्लब म्यानचेस्टर युनाइटेडलाई आमन्त्रण गर्दैछ । यही समूहमा स्पेनिस क्लब भिल्लारियलले आफ्नो घरेलु मैदानमा इटालियन क्लब एटलान्टासँग खेल्दैछ ।
यस्तै समूह ‘जी’ मा स्पेनिस क्लब सेभियाको भिडन्त घरेलु मैदानमा अष्ट्रियन क्लब रेडबुल साल्जवर्गसँग हुँदैछ ।
फ्रान्सेली क्लब लिलले भने घरेलु मैदानमा जर्मन क्लब वल्फ्सवर्गसँग भेट गर्दैछ ।
यस्तै समूह ‘एच’ मा च्याम्पियन लिगको साविकको विजेता इंग्लिस क्लब चेल्सीले रसियन क्लब जेनिथ सेन्ट पिटर्सवर्गसँग आफ्नो घरेलु मैदान स्टामफोर्ड ब्रिजमा खेल्दैछ । सोही समूहका स्वीडेनको माल्मो एफसी र इटालियन च्याम्पियन युभेन्ट्सको खेलपनि आजै हुँदैछ । उक्त खेल माल्मोको घरेलु मैदान इलेडा स्टेडियनमा हुँदैछ ।
यसैगरी आजको सर्वाधिक प्रतिष्ठित खेल रहेको समूह ‘ई’ मा क्याटलान क्लब बार्सिलोनाले जर्मन च्याम्पियन बायर्न म्युनिखसँग भिड्दैछ ।
सो खेल बार्सिलोनाको घरेलु मैदान क्याम्प नोउमा नेपाली समयअनुसार राति १२ः४५ बजे हुनेछ । समूह ‘ई’ मै युक्रेनी क्लब डेनामो किएभले पोर्चुगिज क्लब बेन्फिकासँग खेल्दैछ ।
समूह ‘ई’
बार्सिलोना भर्सेस बायर्न म्युनिख – राति १२ः४५ बजे
डेनामो किएभ भर्सेस बेन्फिका – राति १२ः४५ बजे
समूह ‘एफ’
योङ ब्वाइज भर्सेस म्यानचेस्टर युनाइटेड – राति १०ः३० बजे
भिल्लारियल भर्सेस एटलान्टा – राति १२ः४५ बजे)
समूह ‘जी’
सेभिया भर्सेस साल्जवर्ग – राति १०ः३० बजे
लिल भर्सेस वल्फ्सवर्ग – राति १२ः४५ बजे
समूह ‘एच’
चेल्सी भर्सेस जेनिथ सेन्ट पिटर्सवर्ग – राति १२ः४५ बजे
माल्मो भर्सेस युभेन्ट्स – राति १२ः४५ बजे
