काठमाडौं । सर्वोच्च अदालतले त्रिभुवन अन्तर्राष्ट्रिय विमानस्थलको सफाइ व्यवस्थापनको ठेक्कासम्बन्धी प्रस्ताव नखोल्न अल्पकालीन अन्तरिम आदेश जारी गरेको छ ।
विमानस्थलको सफाइ तथा फोहोर व्यवस्थापनको ठेक्काका लागि विमानस्थल कार्यालयले १३ वैशाखमा प्रस्ताव खोलेको थियो । सो प्रस्तावविरुद्ध अदालतले अन्तरिम आदेश जारी गरेको हो ।
सर्वोच्च अदालतका न्यायाधीश तीलप्रसाद श्रेष्ठको एकल इजलासले २६ जेठमा आह्वान गरेको बोलपत्रको प्रस्ताव नखोल्न र यथास्थितिमा राख्न आदेश दिएको छ ।
यस्तै, सर्वोच्चले अनमोल फ्यासिलिटी क्लिनर्सले त्रिभुवन अन्तर्राष्ट्रिय विमानस्थल कार्यालयलाई विपक्षी बनाएर दिएको रिटमा १५ दिनभित्रै लिखित जवाफ पेश गर्न पनि आदेश दिएको छ ।
विमानस्थल कार्यालयले नेपाली निर्माण व्यवसायीलाई रोक्ने गरी विमानस्थल सफाइ तथा फोहोर व्यवस्थापनको प्रस्ताव आह्वान गरेको थियो ।
सो ठेक्काको लागि प्रस्ताव पेश गर्ने अन्तिम मिति यही ३१ जेठसम्मलाई तोकिएको छ । अदालतले सोही मितिमा विपक्षीलाई छलफलमा उपस्थित हुन आदेश समेत दिएको छ ।
