काठमाडौँ । आजदेखि सरकारले १२ देखि १७ वर्ष उमेर समूहलाई कोभिड–१९ विरुद्धको अतिरिक्त (बुस्टर डोज) खोप दिने भएको छ । यद्यपि बुस्टर डोज लगाउनका लागि सो उमेर समूहका किशोर किशोरीले पूर्ण मात्रा खोप लिएको तीन महिना नाघेको हुनुपर्ने छ ।
सरकारले गत पुस ४ गतेदेखि यो उमेर समूहलाई कोभिड–१९ विरुद्धको खोप दिन थालेको थियो । मुलुकमा यो उमेर समूहमा ३४ लाख २५ हजारभन्दा बढी किशोर किशोरी रहेको सरकारी आँकडाले जनाएको छ ।
सरकारले बुस्टर डोज लगाउन मुलुकभरका स्वास्थ्य निकायलाई बिहीबार नै परिपत्र गरिसकेको बताइएको छ । स्वास्थ्य सेवा विभागका अनुसार बुस्टर डोज लगाउनयोग्य किशोर किशोरीलाई फाइजर वा मोडर्नाको खोप उपलब्ध गराइने छ ।
