धरान । सात वर्षअघि आफ्नै विद्यालयमा अध्ययनरत १५ वर्षीया छात्रालाई बलात्कार गरेको आरोपमा प्रिन्सिपल राज खड्का काठमाडौंको त्रिपुरेश्वरबाट पक्राउ परेका छन् । केन्द्रीय अनुसन्धान ब्यूरो (सीआईबी) को समूहले लुकिछिपी बस्दै आएका ३६ बर्षीय खड्कालाई राजधानीबाट पक्राउ गरेको हो ।
उनलाई आजै जिल्ला प्रहरी कार्यालय सुनसरी ल्याएर अदालतमा उपस्थित गराइने सीआईबीको तयारी छ ।
खड्का विरुद्ध छात्राले २०७५ भदौ २ गते जिल्ला प्रहरी कार्यालय सुनसरीमा जाहेरी दिएको बताइएको छ । प्रहरीले समेत आवश्यक अनुसन्धान सकेर सुनसरी जिल्ला अदालतमा मुद्दा दायर गरेपनि खड्का फरार थिए । उनी विरुद्धको मुद्दा हाल मुल्तबीमा रहेको कारण उनलाई आजै सुनसरी जिल्ला अदालतमा उपस्थित गराउन लागिएको हो ।
खड्का हाल काठमाडौँको नेपालटारमा रहेको एक निजी स्कुलमा प्रिन्सिपलकै रुपमा कार्यरत थिए । पीडित युवतीले सामाजिक सञ्जालमा उनी विरुद्ध पोष्ट गरेपछि खड्का फरार थिए ।
इटहरीस्थित एक निजी स्कुलमा प्रिन्सिपल रहेकै अवस्थामा खड्काले कक्षा ९ मा पढ्दै गरेकी १५ वर्षीया बालिकालाई पटक पटक बलात्कार गरेको आरोप छ ।
