काठमाडौं । चितवन चौंथो संस्करणको एभरेष्ट प्रिमियर लिग (ईपीएल)क्वालिफायर खेलमा पोखरा राइनोजलाई ९ विकेटले पराजित गर्दै फाइनलमा पुगेको छ ।
कीर्तिपुरको त्रिवि क्रिकेट मैदानमा बुधबार भएको क्वालिफायरमा टस हारेर ब्याटिङको निम्तो पाएको पोखराले १५ ओभरमा सबै विकेट गुमाएर ६६ रनको योगफल तयार गरेको थियो ।
चितवनले ७.४ ओभरमा एक विकेटको क्षतिमा ६७ रनको लक्ष्य पूरा गर्दै फाइनलको यात्रा तय गरेको हो ।
चितवन पहिलो पटक ईपीएलको फाइनलमा पुगेको हो । चितवनलाई जित दिलाउन ओपनर मोहम्मद शहजाद र कासिम अनसारीले पहिलो विकेटका लागि ६३ रनको साझेदारी गरेका थिए । शहजदले सर्वाधिक ४८ रन बनाए । उनले २६ बलमा ७ चौका र २ छक्का प्रहार गरे ।
यस्तै आसिम अनसारी १४ र करिम जनत ४ रनमा अविजित रहे । पोखराका नन्दन यादवले १ विकेट लिए ।
टस हारेर ब्याटिङको निम्तो पाएको पोखराले १५ ओभरमा सबै विकेट गुमाएर चितवनसामु ६७ रनको लक्ष्य प्रस्तुत गरेको थियो । पोखराका लागि रिचार्ड लेभीले सर्वाधिक १९ रन बनाए । सुनिल धमलाले १८ रन जोड्दा सुशन भारीले १२ रन बनाए ।
पोखरालाई सस्तैमा समेट्न चितवनका सागर ढकाल र शाहब आलमले ४–४ विकेट लिए । यस्तै सोमपाल कामी र करिम जनतको नाममा १–१ विकेट रह्यो । आजको खेलमा पराजित भएको पोखराले आजै हुने इलिमिनेटरको विजेतासँग दोस्रो क्वालिफायरमा अवसर पाउनेछ ।
भैरहवा ग्लाडिएटर्स र काठमाडौं किङ्ग्स–११ ले बुधबार नै इलिमिनेटरमा प्रतिस्पर्धा गर्दैछन् । उक्त खेलको विजेताले पोखरासँग खेल्दै फाइनलमा चितवनसँग भेट गर्नेछ । प्रतियोगिताको विजेताले ५० लाख प्राप्त गर्नेछ भने उपविजेताले १५ लाख पाउनेछ ।