काठमाडाैं । नेपाली काँग्रेसले स्थानीय तह निर्वाचनमा सत्ता गठबन्धनसँग सहकार्य गर्ने भएको छ । सोमबार पार्टी कार्यालय सानेपामा बसेको केन्द्रिय समितिको बैठकले गठबन्धनसँग सहकार्य गरेर नै स्थानीय तह निर्वाचनमा पार्टी सहभागी बन्ने निस्कर्ष निकालेको हो ।

बैठकपछि सञ्चारकर्मीहसँग बोल्दै पार्टी प्रवक्ता डा. प्रकाशशरण महतले अधिकांश सदस्यहरुले गठबन्धन गरेर जानुपर्ने सुझाव दिएको र सोहीअनुसार मंगलबार बस्ने केन्द्रिय समितिको बैठकले प्रस्ताव पास गर्ने बताउनु भयो । उहाँले आज सबै केन्द्रिय सदस्यहरुले आफ्नो भनाइ राखिसकेको र बैठकमा पार्टीलाई बलियो बनाउने भन्ने बारेमा छलफल भएको बताउनु भयो । प्रवक्ता महतले बैठकमा ‘घर घर जाऔँ, नेपाली काँग्रेस जिताऔँ’ अभियानको मूल्यांकन भएको समेत बताउनु भयो । उहाँले बैठकमा कतिपय सदस्यहरुले गठबन्धन नगरीकन काँग्रेस निर्वाचनमा जानुपर्ने धारणा राखेकोसमेत प्रवक्ता महतले बताउनु भयो ।

प्रवक्ता महतले भन्नुभयो, ‘छलफल आज टुंगिएको छ । भोलि तीन बजेको बैठकमा हामी निर्णय गर्छौं । बोल्ने क्रम आज समाप्त भएको छ । बोल्ने सिलसिलामा पार्टीलाई कसरी मजबुत बनाउने स्थानीय निकायको निर्वाचनमा । सँगै यो समग्र समिक्षा, घर घर जाऔँ, नेपाली काँग्रेस जिताऔँ अभियानको मूल्यांकन भयो ।

साथीहरु विभिन्न जिल्लामा खट्नुभएको थियो । उहाँहरुको सुझाव र प्रतिवेदनमाथि पनि छलफल भयो । पार्टीको यथार्थ स्थितिको पनि समग्रमा मूल्यांकन भयो । देशमा जुन गठबन्धनको सरकार छ, विशिष्ट परिस्थितिमा जुन गठबन्धन सरकार बनेको छ, लोकतान्त्रिक मूल्य र मान्यता, संवैधानिक मर्यादाहरुलाई कमजोर गर्ने काम जुन ओली सरकारबाट भयो, त्यो परिस्थितिमा यो गठबन्धन बनेको हो । त्यसैले अधिकांश साथीहरुले केन्द्रिय समितिको बैठकमा आवश्यक्ताको आधारमा, सिद्धान्तमा तालमेल, गठबन्धन गरेर जाँदा पार्टी बलियो हुने र आउने संसदीय निर्वाचनमा पनि पार्टीले जित्ने परिस्थिति निर्माण हुनसक्ने यो किसिमको सल्लाह, सुझाव धेरै साथीहरुले दिनुभयो ।

कतिपय साथीहरुको मत गठबन्धन नगरीकन एक्लै पार्टी गएर पार्टीलाई परीक्षणमा राख्नुपर्छ, परिचय गर्नुपर्छ भन्ने आएको थियो । यसै सल्लाह सुझावका आधारमा प्रश्ताव तयार हुन्छ र भोलि तीन बजे केन्द्रिय समितिको बैठक बसेर हामीले निर्णय गर्नेछौँ । भोलि सैद्धान्तिक निर्णयसहित प्रश्ताव पास हुन्छ ।’

प्रवक्ता महतले पार्टीको अर्को केन्द्रिय समिति बैठक भोलि (मंगलबार) अपरान्ह ३ बजे बस्ने र केन्द्रिय समितिका सदस्यहरुको धारणाअनुसार नै सैद्धान्तिक निर्णयसहित प्रस्ताव पास हुने बताउनु भयो ।