हेटौंडा । वाग्मती प्रदेशकी मुख्यमन्त्री अष्टलक्ष्मी शाक्यले पदबाट राजीनामा दिनुभएको छ । प्रदेशसभामा आफूले राखेको विश्वासको मतसम्बन्धी प्रस्तावमा मतदान हुने दिननै राजीनामा घोषणा गर्नुभएको हो ।
मुख्यमन्त्री शाक्यले प्रदेशसभा बैठकलाई सम्बोधन गरेर राजीनामा दिनुभएको हो ।उहाँको राजीनामापछि प्रदेशमा एकीकृत समाजवादीका नेता राजेन्द्र पाण्डेको नेतृत्वमा वाग्मती प्रदेश सरकार गठन हुन बाटो खुलेको छ ।
समाजवादीसँगै नेपाली कांग्रेस, नेकपा माओवादी लगायतका दलको सहभागितामा वाग्मती प्रदेश सरकार गठन हुने भएको छ । बागमती प्रदेशसभामा हाल १०९ प्रदेशसभा सदस्य छन् । जसमा नेकपा (एमाले)का ४३, नेकपा (माओवादी केन्द्र)का २३, नेपाली कांग्रेसका २२, नेकपा (एकीकृत समाजवादी)का १३, विवेकशील साझा दलका तीन, नेपाल मजदुर किसान पार्टी (नेमकिपा) र राप्रपाका दुई–दुई तथा जनता समाजवादी पार्टी (जसपा)का एक प्रदेशसभा सदस्य छन् । विश्वासको मतका लागि ५५ सांसद आवश्यक पर्छ ।
मुख्यमन्त्री शाक्य भदौ २ मा मुख्यमन्त्री चयन हुनुभएको हो । उहाँ नेपालकै पहिलो महिला मुख्यमन्त्री समेत हुनुहुन्छ ।
