काठमाडौं । अमेरिकी राजदूत सांस्कृतिक संरक्षण कोषको सहयोगमा मुस्ताङ जिल्लाको मराङ गाउँस्थित लो गेखर अर्थात घर गुम्बाको भूकम्प प्रतिरोधात्मक जीर्णोद्दार हुने भएको छ । दुई लाख पचासी हजार अमेरिकी डलर अनुदान सहयोगमा गुम्बाको जीर्णोद्दार हुन लागेको नेपालमा स्थित अमेरिकी दूतावासले जनाएको छ ।
हालै एक कार्यक्रमका बिच गण्डकी प्रदेशका सांसद महेन्द्र थकाली, लो गेकर दामोदर कुन्ड गाउँपालिकाका प्रमुख लोप्साङ्ग सोम्फेल बिष्ट तथा दूतावासका पब्लिक अफेयर्स अफिसर ग्यारेट विल्करसनले संयुक्त रूपमा गुम्बाको जीर्णोद्दार कार्यको उद्घाटन गर्नुभयो।
तिब्बती बौद्धमार्गीहरूको सवैभन्दा पुरानोमध्ये एक उक्त गुम्बामा २०१५ को महाभूकम्प तथा बर्षौंदेखिको जलवायु सम्बन्धी विविध कारणहरूले गम्भीर क्षति पुगेको थियो।
यस परियोजनाले उक्त गुम्बा भवनको पूर्ण जीर्णोद्दार गर्नुका साथै कलाकृतिहरूको अभिलेक राख्ने तथा दीर्घकालीन संचालन योजना समेत बनाउनेछ जसले गर्दा भबिष्यमा धर्मावलम्बी र पर्यटकहरूले सुरक्षित र सजिलो तरीकाले उक्त सम्पदाको भ्रमण गर्न सक्ने छन् यो परियोजना सन् २०२३ मा सम्पन्न हुने दूतावासले जनाएको छ ।
