काठमाडौं, भदौ ७ । एमाले अध्यक्ष केपी ओलीले कैलाली घटना थारुले नभइ आतंककारी गराएको बताएका छन् ।
प्रेस चौतारीले सोमवार राजधानीमा आयोजना गरेको कार्यक्रममा अध्यक्ष ओलीले थारुहरुले
आतंककारी गतिविधि गर्नै नसक्ने जिकिर गर्दै राजनीतिका नाममा आतंककारी गतिविधि भएको दाबी गरे । उनले भने, ‘जाति, भाषा, धर्ममा मागहरु वार्ताबाट समाधान हुन्छन् । निहत्था प्रहरीमाथि आधुनिक हतियारले आक्रमण गर्ने आतंककारी हुन् ।’ उनले सरकारलाई आतंककारीलाई नियन्त्रण गर्न र मृतकलाई क्षतिपूर्ति दिन आग्रह गरे ।
सोही कार्यक्रममा एमाले बरिष्ठ नेता झलनाथ खनालले पनि संविधान जारी गर्न नदिन कैलालीमा विध्वंशकारी र आतंककारीहरुले सुरक्षाकर्मीमाथि आक्रमण गरेको जिकिर गरे । खनालले भने, ‘संविधान जारी हुन नदिन आतंककारीहरु क्रियाशील छन् । हामी कुनै पनि हालतमा संविधान जारी गरी उनीहरुको प्रयास असफल पार्छौ ।’ एमालेले कैलाली घटनाको भत्सना गर्दै जनतको सुरक्षा व्यवस्था गर्न सरकारसँग आग्रह गरेको छ ।
