काठमाडौं । आमरण अनसनरत डा. गोविन्द केसीले चिकित्सा शिक्षा विधेयकमा त्रुटी भएको र उक्त त्रुटीलाई सुधार गर्न माग गरेका छन् ।
उनले आज अनसन स्थलबाटै सांसदहरुलाई सार्वजनिक पत्र लेखेर विधेयकमा भएको त्रुटी सच्याउन आग्रह गरेका हुन् ।
केसीले आफूले कुनै हठ वा अहंकार देखाएको नभई सत्यको आग्रह गरेको बताएका छन् । उनले केहि सांसद हरुको हतारको निर्णयमा प्रस्तुत भएको बिधेयकले गुणस्तरीयतमा सुधार गर्न नसक्ने जनाएका हुन् । उनले संसदको शिक्षा तथा स्वास्थ्य समितिबाट पारित भएको विधेयकले चिकित्सा शिक्षा र स्वास्थ्य सेवाको सुधार र गुणस्तरीयता सुनिश्चित गर्ने यात्रा अधुरै नै रहने बताएका छन् ।
एउटा विश्वविद्यालयले पाँचभन्दा बढी मेडिकल कलेजलाई सम्बन्धन दिन नहुने आफ्नो माग माथेमा कार्यदलको सुझाव र स्वास्थ्य सेवाको गुणस्तरसँग समेत जोडिएको उनले बताएका छन् । डा.केसीको पत्रमा भनिएको छ, ‘यस सन्दर्भमा कुनै लहड वा आग्रहमा निर्णय हुनुहुँदैन भन्ने मेरो माग हो ।’
