विराटनगर । विराटनगर महानगरपालिका–बलुवाईकी ११ वर्षीया बालिका रुपमती दासको बलात्कारपछि हत्या भएको प्रहरी अनुसन्धानबाट खुलेको छ ।
हत्यामा संलग्न भएको आरोपमा प्रहरीले विराटनगर ८ का २५ वर्षीय अब्बास अन्सारी र १८ वर्षीय चन्दु महतोलाई पक्राउ गरेको छ । हत्यामा संग्लग्न दुबै जना लागूऔषध प्रयोगकर्ता रहेको प्रहरीले जनाएको छ ।
रुपमतीलाई गत शनिवार घरबाट छिमेकी महमद नेमाको घरमा टिभी हेर्न जाने क्रममा अन्सारी र महतोले लागूऔषधको नसामा अपहरण गरेका थिए ।
अपहरण पछि बालिकालाई बलात्कार गरेको र हत्या गरेर शव भोलिपल्ट बिहान घरदेखि करिब ५०० मिटर दक्षिण खोलामा नग्न अवस्थामा फ्यालिएको प्रारम्भिक अनुसन्धानबाट खुलेको प्रहरीले जनाएको छ ।
प्रहरीका अनुसार पोष्टमार्टम रिपोर्टले पनि बलात्कारपछि हत्या भएको खुलेको हो ।
घटना लगतै प्रहरीले ११ जनालाई नियन्त्रणमा लिएको थियो । खोलामा शव फ्याकेका कारण प्रमाण जुटाउन समय लागेको अनुसन्धानमा संलग्न जिल्ला प्रहरी कार्यालय मोरङका प्रवक्ता डीएसपी घनश्याम श्रेष्ठले जानकारी दिए । घटना लगतै पक्राउ परेका दुबैले घटना स्वीकार गरेपनि प्रहरीले प्रमाण जुटाउन नसकेको कारण केश लम्बिएको उनले बताए ।
डीएसपी श्रेष्ठले घटनामा संलग्न दुई जनालाई आइतबार नै सार्बजनिक गर्ने तयारी रहेको बताए ।
