काठमाडौं । म्यान्चेस्टर सिटीले इंग्लिस प्रिमियर लिग फुटबलमा आर्सनललाई पराजित गरेको छ ।
आइतबार राति घरेलु मैदानमा भएको खेलमा सिटीले आर्सनललाई ३–१ गोल अन्तरले पराजित गरेको हो । सिटीको जितमा सर्जियो अग्युरोले ह्याट्रिक गोल गरे । आर्सनलका लागि लौरेन्ट कोसील्नीले एक गोल फर्काए पनि सिटीलाई रोक्न भने सकेनन् ।
अग्युरोले खेलको पहिलो मिनेटमा नै गोल गर्दै सिटीलाई सुरुवाती अग्रता दिलाए । तर खेलको ११ औं मिनेटमा आर्सनलका लौरेन्टले गोल गर्दै खेल १–१ गोलको बराबरीमा ल्याएका थिए । खेलको ४४ औं मिनेटमा अग्युरोले अर्को गोल गर्दै सिटीलाई पुनः २–१ गोलको अग्रता दिलाए ।
पहिलो हाफमा २–१ गोलअन्तरले अघि रहेको सिटीले दोस्रो हाफमा थप एक गोल गर्दा आर्सनलले भने कुनै गोल गर्न सकेन । ६१ औं मिनेटमा अग्युरोले गोल गर्दै ह्याट्रिक गोल पूरा गरेका थिए ।
त्यस्तै, आइतबार राति नै भएको अर्को खेलमा म्यान्चेस्टर युनाइटेडले लेष्टर सिटीलाई १–० गोलअन्तरले पराजित गरेको छ ।
जितपछि म्यान्चेस्टर सिटी लिगको दोस्रो स्थानमा उक्लिएको छ । सिटीले २५ खेलबाट ५९ अंक बनाएको छ । आर्सनल भने २५ खेलबाट ४७ अंक बनाउँदै लिगको छैटौं स्थानमा छ ।
लिगको शीर्ष स्थानमा रहेकमो लिभरपुलको ६१ अंक छ ।
