काठमाडौं । पृथकतावादी गतिविधि संलग्न रहेका कारण पटक पटक जेल परेका मधेशी युवा सिके राउत बिहीबार सर्वाेच्च अदालतको आदेशबाट रिहा भएका छन् । स्वतन्त्र मधेसको एजेण्डासहित नेपालमा पृथकतावादी आन्दोलनमा लागेका उनलाई बिहीबार सर्वाेच्च अदालतले विना शर्त रिहा गर्न दिएको आदेशसँगै एक पटक नेपालको राजनीतिक वृत्तमा नयाँ तरंग उत्पन्न भएको छ ।
यो तरंगसँगै आज नै प्रधानमन्त्री केपी ओली र उनले एकै स्थानबाट सम्बोधन गर्ने अर्काे समाचारले पनि नेपालको राजनीतिक बजारलाई केही तताएको छ । उनले आफूले गरिरहेका पृथकतावादी गतिविधी त्याग्ने र अब अखण्ड नेपाल स्वीकार गर्ने भएको समाचारको चर्चा राजधानीमा शुरु भएको हो ।
प्रधानमन्त्री ओली र सिके राउतले आज अपरान्ह राजधानीको राष्ट्रिय सभागृहमा आयोजना भएको सभालाई सँगै सम्बोधन गर्ने कार्यक्रम सार्वजनिक भएको छ । यतिमात्र होइन, सो सभामा सम्बोधन गर्ने क्रममा नै उनी नेकपा प्रवेश गरेको घोषणा पनि गर्नसक्ने अनुमान गरिएको छ । सरकारका प्रतिनिधिहरुसँग भित्रभित्रै वार्ता गरेका राउत बिहीबार सर्वाेच्चको आदेशले रिहा भएका थिए ।
आजैबाट पृथकतावादी गतिविधि परित्याग गर्ने भएका उनले नेकपामा प्रवेश गर्ने बारेमा कुनै आधिकारीक जानकारी त गराएका छैनन् तर पनि उनले यस विषयमा सोँचेको उनका कार्यकर्ताहरुले जनाएका छन् । स्रोतका अनुसार राउतको स्वतन्त्र मधेस गठनबन्धनसमेत आजैबाट विघटन हुने जानकारी भने गराइसकेका छन् । तर, तत्काल नेकपामा प्रवेश गर्ने विषयमा भने उनले केही बोलेका छैनन् ।
