काठमाडौँ: विगत २५ वर्षदेखि नेपाली साङ्गीतिक क्षेत्रमा निरन्तर क्रियाशील गायक सुरजकुमार थापाको आधुनिक गीति एल्बम ‘नाचन नाचन’ सार्वजनिक भएको छ ।
राजधानीमा आयोजित एक कार्यक्रममा सन्तोष बस्न्यातको प्रस्तुति तथा शब्द र सङ्गीत रहेको उक्त गीतमा गायन तथा संगीत संयोजन सुरजकुमार थापा स्वयंमको रहेको जानकारी दिइयो ।
नेपाली लोक तथा आधुनिक बाध्य यन्त्रहरूको संयोजनमा तयार पारिएको सो गीतलाई मिक्सिङ तथा मास्टरिङ अशोक महर्जन र रेकर्डिङ शम्भुकुमार तण्डुकारले गर्नुभएको छ ।
विगत १५ वर्षदेखि चर्चित नेपाली साङ्गीतिक समूह ‘नेपथ्य’ मा आबद्ध गायक थापा विगत १७ वर्षदेखि विभिन्न विद्यालयमा सङ्गीत शिक्षकको रुपमा कार्यरत रहनुभएको छ ।
‘पश्चिम कोही पूर्व घर’ (चर्चित राष्ट्रिय गीत), ‘यस पालि त जन्ते बाख्रो खान पाइने भो’, ‘गहिरो घाउ’, ‘भो माया लाउँदिन’ लगायत गीतमा स्वर दिइसक्नुभएका गायक थापाले हालसम्म ‘चिनारी’, ‘क्यानभास’ र ‘परिभाषा’ गरी तीनवटा एकल र थुप्रै कलेक्सन एल्बममा स्वर दिनुभएको छ । केही नेपाली चलचित्रमा उहाँको पाश्व स्वर रहेको छ ।
