चितवन । भरतपुर महानगरपालिका कार्यालयमा बिस्फोट तथा आगजनी गरेको आरोपमा चितवनमा विप्लव नेतृत्वको नेकपाका ६ जना कार्यकर्ता प्रहरीले पक्राउ गरेको छ ।
पक्राउ पर्नेमा सचिवालय सदस्य रामप्रसाद तिमिल्सिना, राप्ती नगरपालिकाका जनसरकार प्रमुख गुणराज श्रेष्ठ, अनेरास्ववियु क्रान्तिकारी बीरेन्द्र बहुमुखी क्याम्पसका इकाइ अध्यक्ष विक्रम न्यौपाने, चैत ३ गते जिल्ला सदस्य वीरबहादुर तामाङ र चैत ११ गते राति अखिल क्रान्तिकारी यातायात व्यवसायी संघका जिल्ला अध्यक्ष मित्र केसी र कार्यकर्ता जयबहादुर कुँवर रहेका छन् ।
जिल्ला प्रहरी कार्यालय चितवनका प्रवक्ता डीएसपी दुर्गा रेग्मीका अनुसार पक्राउ परेका सबैलाई बिस्फोट, आगजनी तथा संगठित अपराध अन्र्तगत म्याद थप गरी मुद्धा चलाइएको बताए । उनीहरुसँग थप सोधपुछ र आवश्यक अनुसन्धान जारी छ ।
केही दिनअघि भरतपुर महानगरपालिका वडा नः ५ को कार्यालयमा बिस्फोट गरी क्षति गराइएको थियो । सोही घटनामा उनीहरुको संलग्नता रहेको भन्दै प्रहरीले बिस्फोट तथा आगजनीको मुद्धा लगाएको छ ।
