काठमाडौँ । बारा र पर्सामा आएको भीषण हावाहरीबाट भएको बिनासप्रति प्रतिबन्धित नेत्रविक्रम चन्द विप्लव समूहले दुःख व्यक्त गरेको छ । महासचिव विप्लवले एक विज्ञप्ति जारी गर्दै आइतबार भएको घटनाले सिङ्गो पार्टी पंक्तिलाई निकै दुखी बनाएको उल्लेख गरिएको छ ।
सम्बन्धीत घटनास्थलमा आफ्ना सम्पूर्ण पार्टी पंक्ति र जनवर्गीय संगठनका कार्यकर्ताहरुलाई उद्धारमा लाग्न उक्त विज्ञप्तिमा विप्लवले निर्देशनसमेत दिएका छन् ।
उक्त समूहले यो घडीमा मृतकका परिवारलाई राहत, घाइतेहरुको स्वास्थ्य उपचारको व्यवस्था गर्नुका साथै घरबारविहीनहरुको व्यवस्थापनको माग गरिएको छ ।
उनले विज्ञप्तिमा भनेका छन् ‘उक्त प्राकृतिक प्रकोपमा परी ज्यान गुमाउने सबैप्रति हार्दिक श्रद्धाञ्जली व्यक्त गर्नुका साथै मृतकका परिवारप्रति गहिरो समवेदना र घाइतेहरुको शिघ्र स्वास्थ्य लाभको कामना गर्दछौँ ।’
