काठमाडौं । नागरिक लगानी कोष र एभरेष्ट अस्पताल प्रा.लि.बीच कोषका सहभागी, कर्मचारी तथा उनीहरूका आश्रित परिवारका सदस्यलाई सहुलियत दरमा स्वास्थ्य सेवा उपलब्ध गराउने सम्झौता भएको छ।
२०८३ असोज २९ गते भएको सम्झौतामा नागरिक लगानी कोषका निमित्त कार्यकारी निर्देशक हेमन्त पोखरेल र एभरेष्ट अस्पतालका सहप्रशासक यादवप्रसाद ढुंगानाले हस्ताक्षर गरेका छन्।
सम्झौताअनुसार कोषसँग आबद्ध कर्मचारी, सहभागी तथा उनीहरूका आश्रित परिवारका सदस्यले अस्पतालको बिल र परीक्षण सेवामा २० प्रतिशत छुट पाउनेछन्। यस्तै, शल्यक्रिया कक्ष (ओटी) र फार्मेसीको बिलमा १० प्रतिशत छुट उपलब्ध हुनेछ।
तर बाह्य स्रोतबाट लिइने सेवा, चिकित्सकको परामर्श शुल्क, एम्बुलेन्स शुल्क तथा उपकरणमा भने छुट लागू हुने छैन।
सम्झौताअनुसार अस्पतालले कोषका सक्रिय सहभागीलाई एम्बुलेन्स सेवा, विशेष स्वास्थ्य प्याकेज तथा आवश्यकताअनुसार स्वास्थ्य शिविरसमेत सञ्चालन गर्नेछ। स्वास्थ्य शिविरमा सहभागी हुने चिकित्सकका लागि आवश्यक प्रोत्साहनको व्यवस्था पनि गरिने उल्लेख छ।
स्वास्थ्य सेवा लिने कर्मचारी तथा सहभागीको पहिचान नागरिक लगानी कोषको परिचयपत्रका आधारमा गरिनेछ। परिचयपत्र नभएका आश्रित परिवारका सदस्यको हकमा भने कोषले आवश्यक विवरण उपलब्ध गराउने वा अस्पताललाई अग्रिम जानकारी गराउने व्यवस्था गरिएको छ।
सम्झौताले कोषसँग आबद्ध कर्मचारी तथा सहभागीका परिवारलाई स्वास्थ्य उपचारमा आर्थिक सहुलियत पुग्ने अपेक्षा गरिएको छ। साथै, स्वास्थ्य सेवा प्रदान गर्ने क्रममा प्राप्त हुने व्यक्तिगत तथा अन्य सूचनालाई सुरक्षित र गोप्य राख्न दुवै संस्थाले प्रतिबद्धता जनाएका छन्।
