इस्लामाबाद। पाकिस्तानका प्रधानमन्त्री शहबाज सरिफले साउदी अरबको आत्मरक्षाको वैध अधिकारप्रति आफ्नो देशको पूर्ण समर्थन रहेको पुनः पुष्टि गर्नुभएको छ ।
प्रधानमन्त्री कार्यालयका अनुसार, सरिफले बुधबार इस्लामाबादमा ‘मक्का रक्षा गठबन्धन’का पहिलो महासचिव नौमान महमुदसँगको भेटमा पाकिस्तान साउदी अरबको सार्वभौमिकता, सुरक्षा र क्षेत्रीय अखण्डताको रक्षाका लागि प्रतिबद्ध रहेको बताउनुभएको हो ।
भेटका क्रममा सरिफले महमुदलाई नयाँ जिम्मेवारी सम्हालेकोमा बधाई दिँदै ‘मक्का संयुक्त रक्षा सम्झौता’लाई क्षेत्रीय शान्ति, एकता र स्थिरताका लागि ऐतिहासिक उपलब्धिका रूपमा व्याख्या गर्नुभयो ।
प्रधानमन्त्री कार्यालयद्वारा जारी विज्ञप्तिमा पाकिस्तानले सम्झौताअन्तर्गत साउदी अरबको सार्वभौमिकता र सुरक्षाको रक्षा गर्न दृढतापूर्वक साथ दिने उल्लेख छ । सरिफले साउदी अरबको क्षेत्रीय अखण्डता र सुरक्षाप्रति पाकिस्तानको प्रतिबद्धता अटल रहेको पनि बताउनुभयो ।
भेटमा महासचिव महमुदले सम्झौताको ढाँचाभित्र सदस्य राष्ट्रबीच रक्षा तथा रणनीतिक सहयोग अभिवृद्धि गर्न भइरहेका प्रयासबारे प्रधानमन्त्री सरिफलाई जानकारी गराउनुभएको थियो ।
यसैबीच, यमनको हुथी समूह र साउदी नेतृत्वको गठबन्धनबीच पछिल्ला दिनमा एकअर्काविरुद्ध आक्रमण जारी रहेको समाचारमा उल्लेख छ । अक्टोबर १० मा साउदी राजधानी रियादस्थित किङ खालिद अन्तरराष्ट्रिय विमानस्थलको टर्मिनलमा भएको आक्रमणमा १२ जनाको मृत्यु भएको र ३०९ जना घाइते भएको जनाइएको छ ।
साउदी अरब, टर्की र पाकिस्तानले गत अगस्टमा ‘मक्का संयुक्त रक्षा सम्झौता’मा हस्ताक्षर गरेका थिए । सम्झौताअनुसार, तीनमध्ये कुनै एक देशमाथि सशस्त्र आक्रमण भए त्यसलाई सबै सदस्य राष्ट्रमाथिको आक्रमणका रूपमा लिइनेछ । यस व्यवस्थाले तीन देशबीच सामूहिक सुरक्षा र रक्षा सहकार्यलाई थप मजबुत बनाउने अपेक्षा गरिएको छ । (रासस/सिन्ह्वा)
