काठमाडौँ । गृह मन्त्रालयले सशस्त्र प्रहरी महानिरीक्षक (आईजी) वंशी राज दाहाललाई निलम्बन गरेको छ।
सुरक्षासँग सम्बन्धित संवेदनशील सूचना चुहावट गरी आचरणविपरीत कार्य गरेको आरोपमा सशस्त्र प्रहरी बल, नेपालबाट कारबाहीका लागि सिफारिस प्राप्त भएपछि गृह मन्त्रालयले दाहालमाथि छानबिन अघि बढाउँदै निलम्बन गरेको हो।
गृह मन्त्रालयका सहसचिव तथा प्रवक्ता आनन्द काफ्लेद्वारा सोमबार जारी विज्ञप्तिअनुसार मन्त्रालयको २०८३ असोज १९ गतेको निर्णयअनुसार दाहाललाई निलम्बन गरिएको हो।
मन्त्रालयले आरोपमाथि जाँचबुझ गर्न जाँचबुझ अधिकृतसमेत तोकेको छ। तीन दिनभित्र जाँचबुझ सम्पन्न गरी मन्त्रालयमा प्रतिवेदन पेस गर्न निर्देशन दिइएको गृह मन्त्रालयले जनाएको छ।
विज्ञप्तिमा गृह मन्त्रालय मातहतका प्रत्येक कर्मचारीबाट हुने पदीय आचरणविपरीतका कार्य, संवेदनशील गोप्य सूचनाको चुहावट तथा शान्ति सुरक्षामा प्रतिकूल असर पार्ने गतिविधिमाथि मन्त्रालयले सूक्ष्म निगरानी तथा विश्लेषण गरिरहेको उल्लेख छ।
कानुनविपरीत हुने जुनसुकै गतिविधि वा घटनामा संलग्न व्यक्तिलाई प्रचलित कानुनबमोजिम कारबाही गरिने मन्त्रालयले स्पष्ट पारेको छ। साथै गृह मन्त्रालय विधिको शासन, कानुनको परिपालना तथा सार्वजनिक शान्ति सुरक्षाको संरक्षणप्रति प्रतिबद्ध रहेको जनाएको छ।
