नुवाकोट । नुवाकोटको विदुर नगरपालिका–५ देवीघाट र बेलकोटगढी नगरपालिका–८ जिलिङ जोड्ने गरी नेपाली सेनाले देवीघाटमा एक्रोब्रिज जडानको काम तीव्र पारेको छ ।
भोटेकोशी नदीमा आएको बाढीले उक्त स्थानमा रहेका दुईवटा पक्की पुलमा क्षति पुर्याएपछि आवागमन सहज बनाउन नेपाली सेनाको टोलीले एक्रोब्रिज जडान थालेको हो । पुरानै पुलका जिप (ज्याकिङ/जडान संरचना) को उपयोग गरी एक्रोब्रिज निर्माण अघि बढाइएको जनाइएको छ ।
५७.५ मिटर लम्बाइ र ५.५ मिटर चौडाइ रहेको उक्त एक्रोब्रिजको भारवहन क्षमता ७० टन रहेको छ । पुल निर्माण सम्पन्न भएपछि देवीघाट र जिलिङबीचको आवागमन सहज हुनुका साथै बाढीका कारण अवरुद्ध यातायात पुनः सञ्चालनमा आउने अपेक्षा गरिएको छ ।
नेपाली सेनाले पाँच दिनभित्र पुल जडान सम्पन्न गर्ने लक्ष्य राखेर काम अघि बढाएको छ ।
तस्बिर: रामहरि न्यौपाने-रासस
