काठमाडौँ। शिक्षा तथा खेलकुदमन्त्री सस्मित पोखरेलले खेलकुद क्षेत्रले विद्यार्थी तथा युवाको मानसिक स्वास्थ्यमा सहयोग पुर्याइरहेको बताउनुभएको छ ।
नेपाल खेलकुद पत्रकार मञ्च (एनएसजेएफ) द्वारा आज यहाँ आयोजित २३औँ संस्करणको पल्सर स्पोर्टस अवार्ड २०८२ लाई सम्बोधन गर्दै मन्त्री पोखरेलले अहिलेको सङ्कटको अवस्थामा खेलकुद क्षेत्रले बाढी प्रभावित बालबालिका तथा विद्यार्थीको मनोबल बढाउन महत्वपूर्ण भूमिका खेलिरहेको बताउनुभयो ।
“हालैको विनाशकारी बाढीमा धेरैले आमाबुबा गुमाउनुभएको छ । बाढीले गर्दा कतिपयको गाउँ नै छैन । यसबीचमा धेरैले मानसिक समस्या भोगिरहनुभएको छ । यस्तो अवस्थामा उहाँहरूको मानसिक स्वास्थ्यमा सहयोग पुर्याउन खेलकुद क्षेत्रले राम्रो भूमिका खेलिरहेको छ,” मन्त्री पोखरेलले भन्नुभयो, “हाम्रो टोली पनि बाढी प्रभावित क्षेत्रमा गएर विद्यार्थी तथा बालबालिकालाई खेलकुद सामग्री वितरण गरिरहेको छ । साथै खेलकुद प्रतियोगिता गर्ने तयारी गरिरहेका छौँ ।”
मन्त्री पोखरेलले सरकारको अहिलेको प्राथमिकता बाढी प्रभावितको उद्धार र राहत वितरण रहेको बताउनुभयो । उहाँले बाढी प्रभावितलाई आर्थिक सहयोग गर्ने खेलकुद क्षेत्रका सङ्घसंस्थालाई धन्यवादसमेत दिनुभयो । स्पोर्टस अवार्डजस्ता कार्यक्रमले खेलाडीको मनोबल वृद्धि गरिहरहेको उल्लेख गर्दै मन्त्री पोखरेलले आगामी दिनमा पनि निरन्तरता दिन आग्रह गर्नुभयो ।
आसन्न संस्करणको एसियाली खेलकुद प्रतियोगितामा सहभागी हुने खेलाडीलाई मन्त्री पोखरेलले शुभकामना दिनुभयो । उहाँले सीमित स्रोतसाधनका बाबजुद खेलाडीले महत्वपूर्ण उपलब्धि हासिल गरिरहेको उल्लेख गर्दै मिहिनेत जारी राख्न आग्रह गर्नुभयो ।
“खेलाडीले देशको गौरवलाई सधैँ माथि राख्नुभएको छ । राज्यले सीमित स्रोतसाधन उपलब्ध गराउँदा पनि खेलाडीले देशको झन्डालाई माथि राखेर जति मेहनत गर्न सकिन्छ त्यति गरिरहनुभएको छ,” मन्त्री पोखरेलले भन्नुभयो । रासस
