काठमाडौँ। काठमाडौँ महानगरपालिकाले आजदेखि राष्ट्रिय सभागृहमा विपद् प्रभावित नागरिक लक्षित ‘मनोसामाजिक परामर्श केन्द्र’ सुरु गरेको छ ।
केन्द्र सञ्चालनबाढीको चोटले मानसिक तथा संवेगात्मक समस्यामा परेका व्यक्तिहरू लक्षित हुनेछ । चिन्ता, तनाव, दुःख तथा अन्य विभिन्न मनोसामाजिक समस्याहरूको सामना गरिरहेका नागरिक लक्षित केन्द्रमा मनोविद्हरूले मनोसामाजिक परामर्श प्रदान तथा सहयोग गर्नुहुनेछ स्वास्थ्य विभागका प्रमुख दीपककुमार केसीले जानकारी दिनुभयो ।
उक्त केन्द्र कामपा स्वास्थ्य विभाग मनोसामाजिक परामर्श सेवा प्रदान गर्ने सङ्घसंस्थाहरूसँगको सहकार्यमा सेवा थालिएको केसीको भनाइ छ ।
केन्द्रमा प्रभावित व्यक्तिहरूले आफ्ना अनुभव, भावना तथा चिन्ता व्यक्त गर्न सक्ने सुरक्षित र सहयोगी वातावरण मिलाइएको छ । यसरी व्यक्त भएका भावनाबाट मनोवैज्ञानिक प्राथमिक उपचार उपलब्ध गराउनु केन्द्र सञ्चालनको मुख्य उद्देश्य रहेको स्वास्थ्य विभागका प्रमुख केसीले भन्नुभयो । उहाँका अनुसार बाढीबाट घाइते भएर वा अन्य कुनै प्रभाव परेर काठमाडौँका अस्पताल तथा अन्य ठाउँमा बसिरहेका व्यक्तिहरूलाई सेवा प्रदान गरिनेछ । शारीरिक उपचारपछि मानसिक स्वास्थ्य परामर्शका लागि अस्पतालहरूले बिरामीहरू केन्द्रमा पठाउन सक्नेछन् । केन्द्रले मानसिक स्वास्थ्य उपचार गर्नु पर्ने व्यक्तिलाई सम्बन्धित अस्पतालमा पठाउनेछ ।
कामपाले सञ्चालन गरेको विपद् व्यवस्थापन सहायता कक्ष एवं विपद् सूचना केन्द्रमा आएका व्यक्तिहरूलाई आवश्यकताका आधारमा केन्द्रमा पठाइनेछ ।
विपद्बाट प्रभावित व्यक्तिहरूलाई मनोसामाजिक परामर्श तथा भावनात्मक सहयोग प्रदान गर्नु, विपद्का कारण उत्पन्न डर, चिन्ता, तनाव, दुःख तथा अन्य भावनात्मक कठिनाइसँग सामना गर्न सहयोग गर्नु, थप मानसिक स्वास्थ्य सेवाको आवश्यकता भएका व्यक्तिहरूको पहिचान गरी सम्बन्धित स्वास्थ्य संस्थामा उपयुक्त रेफरल (प्रेषण) को व्यवस्था गर्नु केन्द्रको काम हो ।
केन्द्रबाट प्रभावित समुदायमा मानसिक स्वास्थ्य तथा मनोसामाजिक सहयोगसम्बन्धी सचेतना र जानकारी प्रदान गरिन्छ । स्वस्थ रहन तनावको सामना गर्ने क्षमता बढाउनु तथा व्यावहारिक तनाव व्यवस्थापनका उपायहरू प्रवद्र्धन गर्नु परामर्शदातालाई जिम्मेवारी प्रदान गरिएको छ ।
बालबालिका, ज्येष्ठ नागरिक, अपाङ्गता भएका व्यक्ति तथा अन्य जोखिममा रहेका र संवेदनशील समूहलाई विशेष ध्यान दिइन्छ । सहयोग प्रदान गरिन्छ ।
सेवा लिने व्यक्तिहरूको व्यक्तिगत गोपनीयता र सम्मानलाई व्यावसायिक ढङ्गले सञ्चालन गरिनेछ । यसबाट विपद्पश्चात् भावनात्मक तथा मनोवैज्ञानिक कठिनाइ भोगिरहेका व्यक्ति तथा परिवारहरूलाई समयमै सहयोग प्रदान हुने विश्वास कामपाको छ । रासस
