कास्की। भदौ १० गते रसुवामा आएको विनाशकारी बाढीपछि सम्पर्कविहीन भएका पोखराका दुई र रुपा गाउँपालिकाका एक जना गरी तीन जना सम्पर्कमा आएका छन् ।
पोखरा महानगरपालिका-१५ का छमप्रकाश थापा र मनु बुढा सुरक्षित रूपमा घर आउनुभएको जिल्ला प्रशासन कार्यालयका सहायक प्रमुख जिल्ला अधिकारी चित्राङ्गत बरालले जानकारी दिनुभयो ।
यही भदौ ९ गते गोसाइँकुण्डका लागि पोखराबाट प्रस्थान गर्नुभएका थापा दम्पतीसँग बाढीलगत्तै सम्पर्क हुन नसकेपछि मेलिना थापाले प्रशासनमा खोजीका लागि निवेदन दिनुभएको थियो । आफ्ना काका/काकी भदौ १५ गते साँझ घरमा आइपुग्नुभएको मेलिनाले बताउनुभयो ।
“बाढी आउनुअघि स्याफ्रुबेँसी पार गरेर उहाँहरू पहिल्यै गोसाइँकुण्डतर्फ लागिसक्नुभएको रहेछ । बाटोमा सम्पर्क हुन नसकेपछि हामी चिन्तित भयौँ र खोजीका लागि आग्रह गरेका थियौँ । पछि सम्पर्क भयो र अहिले घरमा आइसक्नुभएको छ”, थापाले भन्नुभयो ।
यसैगरी, बाढीपछि सम्पर्कविहीन हुनुभएका रुपा गाउँपालिका-७ का २९ वर्षीय सरोज विक पनि परिवारको सम्पर्कमा आउनुभएको प्रशासनले जनाएको छ । बाढीपछि हराएका पोखराका १२ जनाको अवस्था भने अझै अज्ञात रहेको सहायक प्रमुख जिल्ला अधिकारी बरालले जानकारी दिनुभयो ।
हालसम्म सम्पर्कमा नआएकामा पोखरा-१७ की सविना पौडेल (मिश्र), पोखरा-५ की सृष्टि बास्तोला, पोखरा-६ का अभिषेक आचार्य, पोखरा-१२ का लिला बहादुर थापा र सुमन श्रेष्ठको अवस्था अझै अज्ञात छ ।
पोखरा-१५ की देवीकुमारी गुरुङ, पोखरा-१३ की विनु गुरुङ र उषा गुरुङ, पोखरा-१४ का गोविन्दबहादुर अधिकारी, पोखरा-१० काजीपोखरीकी देवीकुमारी गुरुङ, पोखरा-१२ जयटोलका दिलबहादुर थापा तथा पोखरा-११ का उज्ज्वल गुरुङको पनि अवस्था पत्ता लाग्न नसकेको प्रशानले जनाएको छ । रासस
