काठमाडौँ । नेकपा (एमाले)का प्रमुख सचेतक ऐन महरले निर्माणाधीन जलविद्युत आयोजनाका टनेलमा फसेका नागरिकको शीघ्र उद्धार गर्न सरकारसँग आग्रह गर्नुभएको छ ।
प्रतिनिधि सभाको बिहीवारको बैठकमा बोल्दै प्रमुख सचेतक महरले बाढी तथा पहिरोका कारण जलविद्युत आयोजनाका टनेलमा फसेका नागरिकको जीवनरक्षालाई सरकारले पहिलो प्राथमिकतामा राख्नुपर्ने बताउनुभएको हो ।
उहाँले विपद्का कारण उत्पन्न संकटको सामना गर्न सरकारलाई निःसर्त साथ दिन आफूहरू तयार रहेको बताउँदै राष्ट्रिय शोकलाई शक्तिमा बदल्नुपर्ने धारणा राख्नुभयो ।
प्रमुख सचेतक महरले अझै पनि धेरै नागरिक उद्धारका लागि गुहार गरिरहेको उल्लेख गर्दै निर्माणाधीन जलविद्युत आयोजनाका टनेलमा फसेकाहरूको तत्काल खोजी तथा उद्धार गर्न सरकारको ध्यानाकर्षण गराउनुभयो ।
आफ्नो गृहजिल्ला बझाङका दुई जना इन्जिनियरसमेत जलविद्युत आयोजनाको टनेलमा फसेको र उनीहरूको अवस्था अझै अज्ञात रहेको जानकारी दिँदै उहाँले उनीहरूको खोजीलाई प्राथमिकता दिन सरकारसँग आग्रह गर्नुभयो ।
उहाँले भन्नुभयो, “हामी सबै सरकारको साथमा छौँ । हामी निःसर्त सरकारलाई साथ दिन चाहन्छौँ र यो संकटको सामना गर्न चाहन्छौँ । यो शोकलाई हामी शक्तिमा बदल्न चाहन्छौँ ।”
महरले बाढी प्रभावित क्षेत्रका नागरिकको स्वास्थ्यप्रति समेत सरकार गम्भीर बन्नुपर्ने बताउनुभयो । उहाँले प्रभावित नागरिकलाई आवश्यक स्वास्थ्य सेवा तथा अन्य मानवीय सहयोग तत्काल उपलब्ध गराउन सरकारको ध्यानाकर्षण गराउनुभयो ।
