काठमाडौँ । परराष्ट्र मन्त्रालयले रसुवामा आएको बाढीपछि जारी खोज, उद्धार तथा राहतका प्रयासबारे काठमाडौँस्थित कूटनीतिक नियोगका प्रतिनिधिहरूलाई जानकारी गराएको छ ।
बिहीबार आयोजित नियमित पत्रकार सम्मेलनमा मन्त्रालयका प्रवक्ता लोकबहादुर पौडेल क्षेत्रीले मन्त्रालयमा सम्पन्न कूटनीतिक ब्रिफिङसहित समसामयिक विषयमा जानकारी गराउनुभएको हो । परराष्ट्रमन्त्री शिशिर खनालको उपस्थितिमा भएको ब्रिफिङमा विभिन्न मुलुकका राजदूत तथा अन्तर्राष्ट्रिय सङ्गठनका प्रतिनिधिहरूलाई नेपालमा बाढीबाट उत्पन्न वर्तमान अवस्थाबारे जानकारी गराइएको थियो ।
ब्रिफिङका क्रममा कूटनीतिक प्रतिनिधिहरूले विपद्प्रति दुःख व्यक्त गर्दै आ–आफ्ना सरकार तथा संस्थाका तर्फबाट नेपालप्रति ऐक्यबद्धता र सहयोगको प्रतिबद्धता पुनः व्यक्त गरेका थिए । नेपाल सरकारले हालसम्म भएका खोज, उद्धार तथा राहतका प्रगतिबारे जानकारी गराउँदै प्राप्त सहयोगका लागि धन्यवादसमेत दिएको मन्त्रालयले जनाएको छ ।
दाता सम्मेलन आयोजना गर्ने विषयमा सञ्चारकर्मीले सोधेको प्रश्नको जवाफ दिँदै प्रवक्ता क्षेत्रीले सम्बन्धित निकायसँग आवश्यक समन्वय भइरहेको जानकारी दिनुभयो । दाता सम्मेलनका सम्बन्धमा हुने थप निर्णय तथा तयारीबारे पछि विस्तृत जानकारी गराइने उहाँले बताउनुभयो ।
यसैबीच, चीनको केरुङ क्षेत्रमा रहेका करिब एक हजार चार सय नेपाली नागरिकको अवस्थाबारे पनि परराष्ट्र मन्त्रालयले स्पष्ट पारेको छ । तीमध्ये करिब एक सय जना नेपाली तातोपानी नाका हुँदै स्वदेश फर्किने क्रममा रहेको प्रवक्ता क्षेत्रीले जानकारी दिनुभयो ।
सामाजिक सञ्जालमा आएका कतिपय अपुष्ट खबरको खण्डन गर्दै उहाँले केरुङमा रहेका नेपाली हराएर फेला परेको नभई कामको सिलसिलामा त्यहाँ पुगेका र बाटो अवरुद्ध भएका कारण रोकिएको स्पष्ट पार्नुभयो ।
मन्त्रालयका अनुसार विपद्का कारण घरपरिवार तथा आफन्त गुमाएका वा तत्काल स्वदेश फर्कनुपर्ने अवस्थामा रहेका नेपालीलाई प्राथमिकताका साथ नेपाल ल्याउन चिनियाँ पक्षसँग समन्वय भइरहेको छ । वैकल्पिक मार्ग प्रयोग गरेर भए पनि उनीहरूलाई छिट्टै स्वदेश फर्काउने व्यवस्था मिलाइने मन्त्रालयले जनाएको छ ।
