मकवानपुर। नेपाली कांग्रेस बागमती प्रदेश कार्यसमिति र बागमती प्रदेश संसदीय दलले बाढी तथा विपद्बाट प्रभावित नागरिकको राहत तथा उद्धारका लागि रु १० लाख ६६ हजार ६६६ सहयोग गरेको छ ।
कांग्रेस बागमती प्रदेश कार्यसमितिले रु पाँच लाख ५५ हजार ५५५ र प्रदेश संसदीय दलले रु पाँच लाख ११ हजार १११ सहयोग गरेको हो । दुवै रकम कांग्रेस विपद् व्यवस्थापन कोषमार्फत प्रधानमन्त्री दैवी प्रकोप उद्धार कोषमा जम्मा हुने गरी उपलब्ध गराइएको कांग्रेस बागमती प्रदेश कार्यसमितिका सहमहामन्त्री हरिशरण श्रेष्ठले जानकारी दिनुभयो ।
सहमहामन्त्री श्रेष्ठले मङ्गलबार कांग्रेस केन्द्रीय कार्यालय सानेपामा सहयोग रकमको चेक पार्टी केन्द्रीय उपसभापति पुष्पा भुसाललाई चेक हस्तान्तरण गर्नुभएको हो ।
बाढी तथा अन्य प्राकृतिक विपद्का कारण प्रभावित नागरिकको राहत, उद्धार तथा पुनःस्थापनामा सहयोग पुर्याउने उद्देश्यले कांग्रेस प्रदेश कार्यसमिति र संसदीय दलले संयुक्त रूपमा सहयोग गरेको श्रेष्ठको भनाइ छ । रासस
