काठमाडौँ। रूकुम पूर्वकाे सिस्ने गाउँपालिका-६ खोपिचारबाट अवैध लागुऔषध चरेस जस्तो देखिने पदार्थ १६ ग्राम ७८० मिलिग्रामसहित डोल्पा त्रिपुरासुन्दरी नगरपालिका-५ लाहा बस्ने ४१ वर्षीय मोतिबहादुर रोकायलाई प्रहरीले आज बिहान पक्राउ गरेको छ ।
अस्थायी प्रहरी पोष्ट खोपिचारबाट खटिएको प्रहरीले निजलाई उक्त पदार्थसहित पक्राउ गरेको हो । मकवानपुरको हेटौँडा उपमहानगरपालिका-१६ पूर्वेली दमार बस्ने २१ वर्षीय रञ्जन भोम्जनलाई नियन्त्रित लागुऔषध ट्रामाडोल चार हजार ८६० ट्याब्लेट र नाइट्राजेपाम ४५ ट्याब्लेटसहित आज प्रहरीले पक्राउ गरेको छ ।
जिल्ला प्रहरी कार्यालय मकवानपुरबाट खटिएको प्रहरीले निजको घर तलासी गर्दा उक्त लागुऔषध फेला पारी पक्राउ गरेको प्रहरी केन्द्रीय समाचार कक्षले जनाएको छ ।
कैलालीको धनगढी उपमहानगरपालिका-३ बाट अवैध लागुऔषध ब्राउनसुगर जस्तो देखिने पदार्थ एक ग्राम ३८० मिलिग्रामसहित तीन जनालाई आज बिहान प्रहरीले पक्राउ गरेको छ ।
पक्राउ पर्नेहरूमा धनगढी-३ बस्ने बर्दगोरिया गाउँपालिका-६ घर भएका २४ वर्षीय निराजन डगौरा, धनगढी-३ मिलन चोक बस्ने डोटी जोरायल गाउँपालिका-५ घर भएका २३ वर्षीय सुरज नेपाली र धनगढी-३ बस्ने भारत पलिया घर भएका १९ वर्षीय दिनेश गुप्ता रहेका छन् । यस सम्बन्धमा प्रहरीले आवश्यक अनुसन्धान गरिरहेको छ ।
यसैबीच, प्रहरीले सोमबार मुलुकका विभिन्न स्थानबाट अवैध लागुऔषधसहित १६ जनालाई पक्राउ गरेको थियो ।
नवलपरासी पश्चिमको रामग्राम नगरपालिका-१ बाट दुई, कास्कीको माछापुच्छ्रे गाउँपालिका-८ लुम्रेबाट दुई, धनकुटाको धनकुटा नगरपालिका-२ गुराँसेबाट तीन, सुनसरीको इटहरी उपमहानगरपालिका-२ डम्फु चोकबाट दुई, कञ्चनपुरको कञ्चनपुरका विभिन्न स्थानबाट तीन, कैलालीको धनगढी उपमहानगरपालिका-२ बाट एक, झापाको मेचीनगर नगरपालिका-६ पुरानो मेचीपुलबाट एक, चितवनको कालिका नगरपालिका-१ स्थित हरियाली टोलबाट एक र बाँकेको कोहलपुर नगरपालिका-४ गुवागाउँबाट एक जना पक्राउ परेका प्रहरी केन्द्रीय समाचार कक्षले जनाएको छ । रासस
