काठमाडौं । नेकपा (एमाले)का अध्यक्ष केपी शर्मा ओलीले रसुवामा बाढीबाट प्रभावित नागरिकसम्म आवश्यक राहत सामग्री पुग्न नसकेको भन्दै सरकारको राहत व्यवस्थापनप्रति असन्तुष्टि जनाएका छन्।
सोमबार च्यासलस्थित एमाले केन्द्रीय कार्यालयमा बागमती प्रदेश र राजधानी प्रदेश कमिटीले संकलन गरेको राहत रकम बुझ्दै ओलीले सरकारी कोषमा रकम तथा राहत सामग्री जम्मा भए पनि प्रभावित नागरिकले त्यसको प्रत्यक्ष लाभ लिन नसकेको बताएका हुन्।
ओलीले राहत सामग्री र आर्थिक सहयोग संकलन भएर पनि पीडितसम्म प्रभावकारी रूपमा वितरण हुन नसक्नु दुःखद भएको बताए। उनले प्रभावित क्षेत्रमा तत्काल राहत पुर्याउन आवश्यक समन्वय र पहल गर्नुपर्नेमा जोड दिए।
एमालेले सरकारको मात्र भर नपरी विभिन्न संघसंस्था, राजनीतिक दल तथा सरोकारवाला पक्षसँग सहकार्य गरेर राहत संकलन तथा वितरणलाई प्रभावकारी बनाउने उनको भनाइ थियो।
‘कोषमा रकम र राहत जम्मा भएको छ, तर प्रभावित नागरिकसम्म राहत पुग्न सकेको छैन,’ ओलीले भने, ‘यो अवस्था अन्त्य गर्न सबै पक्षसँग समन्वय गरेर अघि बढ्नुपर्छ।’
यसअघि प्रधानमन्त्री राहत कोषमा बाढी प्रभावितका लागि ठूलो रकम जम्मा भइसकेको विवरण सार्वजनिक भएको थियो।
