काठमाडौँ । रसुवाको भोटेकोशी बाढी प्रभावित क्षेत्रमा सूचना तथा सञ्चार प्रवाहलाई सहज बनाउन नेपाल दूरसञ्चार प्राधिकरणले २० थान स्याटेलाइट फोन उपलब्ध गराएको छ।
प्राधिकरणले अन्तर्राष्ट्रिय दूरसञ्चार संघ (आईटीयू) बाट विपद् सहयोगस्वरूप प्राप्त गरेका स्याटेलाइट फोन राष्ट्रिय विपद् जोखिम न्यूनीकरण तथा व्यवस्थापन प्राधिकरणलाई हस्तान्तरण गरेको हो।
उपलब्ध गराइएका फोनमध्ये १० थान रसुवा र १० थान नुवाकोटमा प्रयोग हुने गरी पठाइएको छ। यी स्याटेलाइट फोन आगामी तीन महिनासम्म निःशुल्क प्रयोग गर्न सकिने व्यवस्था गरिएको छ।
टेलिकम नेटवर्कको पहुँच नपुगेका वा नेटवर्क अवरुद्ध भएका दुर्गम क्षेत्रमा समेत स्याटेलाइटको माध्यमबाट फोन तथा एसएमएस सेवा सञ्चालन गर्न सकिन्छ। महँगो प्रविधिका रूपमा लिइने स्याटेलाइट फोन विपद्का बेला सञ्चार सम्पर्क कायम राख्न महत्वपूर्ण मानिन्छ।
बाढी तथा पहिरोका कारण नियमित दूरसञ्चार सेवा प्रभावित भएका क्षेत्रमा स्याटेलाइट फोनको प्रयोगले उद्धार, राहत तथा विपद् व्यवस्थापनमा खटिएका निकायबीच समन्वय र सूचना आदानप्रदानलाई थप प्रभावकारी बनाउने अपेक्षा गरिएको छ।
