काठमाडौं । माथिल्लो त्रिशूली–३ ‘ए’ जलविद्युत् आयोजनाको ६० मेगावाट क्षमताको जलविद्युत् केन्द्रमा मर्मतका क्रममा फसेका कर्मचारीको उद्धारका लागि उद्धार टोलीले उत्खनन कार्यलाई तीव्रता दिएको छ।
फसेका कर्मचारीलाई बाहिर निकाल्न अन्डरग्राउन्ड पावर हाउससम्म पुग्ने केबल टनेलको पुरिएको मुख खोल्ने काम भइरहेको छ। नेपाली सेना तथा दक्ष जनशक्तिसहितको उद्धार टोलीले आवश्यक उत्खनन उपकरण प्रयोग गरी टनेलको अवरोध हटाउने प्रयास गरिरहेको छ।
उद्धारका लागि घटनास्थलमा आवश्यक जनशक्ति तथा उपकरण परिचालन गरिएको छ। पुरिएको केबल टनेलको मुख खोल्न सकेपछि अन्डरग्राउन्ड पावर हाउसमा पुगेर फसेका कर्मचारीको उद्धार गर्ने तयारी गरिएको छ।
उद्धार टोलीले जोखिमपूर्ण अवस्थामा समेत कामलाई तीव्रता दिइरहेको जनाएको छ। कर्मचारीहरूको अवस्थाबारे थप विवरण उद्धार कार्य अघि बढेपछि मात्र स्पष्ट हुने बताइएको छ।
