काठमाडौं । पूर्वराजा ज्ञानेन्द्र शाहले चीनको स्वशासित क्षेत्र तिब्बतमा हिमताल फुटेर आएको भीषण बाढीका कारण नेपालका विभिन्न जिल्लामा भएको जनधनको क्षतिप्रति गहिरो दुःख व्यक्त गर्नुभएको छ।
निर्मल निवासस्थित संवाद सचिवालयमार्फत बुधबार जारी गरिएको देशवासीका नामको सन्देशमा उहाँले बाढीका कारण रसुवा, नुवाकोट, धादिङ, गोरखा, चितवन र नवलपरासीका जलतटीय क्षेत्रका बजार तथा बस्तीमा ठूलो क्षति पुगेको उल्लेख गर्नुभएको छ। बाढीबाट सडक, पुल, विद्युत् आयोजना, खेतीपाती लगायतका भौतिक संरचनामा समेत अपार क्षति भएको उहाँले बताउनुभएको छ।
पूर्वराजा शाहले विपत्तिमा परी ज्यान गुमाएकाहरूको आत्माको चिरशान्तिको कामना गर्दै शोकसन्तप्त परिवारजनप्रति समवेदना व्यक्त गर्नुभएको छ। उहाँले घाइतेहरूको शीघ्र स्वास्थ्यलाभको कामना गर्दै सुरक्षाकर्मीसहित बेपत्ता नागरिकको तत्काल खोजी कार्यलाई तीव्रता दिन आग्रह गर्नुभएको छ।
सन्देशमा खोजी, उद्धार, राहत तथा उपचारका कार्यमा कुनै कमी हुन नदिन सम्बन्धित सबै निकायलाई आग्रह गरिएको छ। सरकार, सुरक्षा निकाय, राष्ट्रसेवक, स्थानीय तह, सामाजिक संघसंस्था तथा आम नागरिकलाई आ–आफ्नो क्षेत्रबाट सक्दो सहयोग गर्दै उद्धार तथा राहत कार्यलाई प्रभावकारी बनाउन एकजुट हुन पनि उहाँले आह्वान गर्नुभएको छ।
सीमासँग जोडिएका छिमेकी मुलुकमा आउने प्राकृतिक विपत्तिले अर्को देशलाई समेत प्रत्यक्ष प्रभाव पार्न सक्ने भन्दै उहाँले यस्ता प्रकोपबाट हुने क्षति न्यूनीकरणका लागि अलग–अलग प्रयासभन्दा त्रिदेशीय संयुक्त प्रयास प्रभावकारी हुने धारणा व्यक्त गर्नुभएको छ।
