काठमाडौं । राष्ट्रिय प्रजातन्त्र पार्टी (राप्रपा)ले बागमती प्रदेशमा नेकपा एमालेका किरण थापालाई मुख्यमन्त्री बनाउन राप्रपाका सांसदहरूको समर्थन रहेको भन्दै बुझाइएको पत्रप्रति आफ्नो सहमति नरहेको स्पष्ट पारेको छ ।
राप्रपाका महामन्त्री एवं सचिवालय प्रमुख राजेन्द्र गुरुङले बुधबार बागमती प्रदेशका प्रदेश प्रमुखलाई पत्र पठाउँदै पार्टीको निर्णय र निर्देशनबिना बुझाइएको उक्त पत्रलाई मान्यता नदिन आग्रह गर्नुभएको हो ।
राप्रपाको २०८३ साउन २० गते बसेको कार्यसम्पादन समिति बैठकले वर्तमान परिस्थितिमा कुनै पनि प्रदेश सरकारको सत्ता राजनीतिको गणितीय चलखेलमा सहभागी नहुने निर्णय गरेको पत्रमा उल्लेख छ । प्रदेश सरकार गठनका सम्बन्धमा निर्णय गर्नुपर्ने अवस्था सिर्जना भए पार्टीको बृहत्तर हितलाई ध्यानमा राखी उपयुक्त निर्णय लिने जिम्मेवारी अध्यक्षलाई दिइएको पनि राप्रपाले जनाएको छ ।
त्यस्तै, बागमती प्रदेशसभामा सरकार निर्माणसम्बन्धी मतदान तथा समर्थन प्रक्रियामा अर्को निर्देशन प्राप्त नभएसम्म तटस्थ रहन पार्टीले संसदीय दलका नेतालाई निर्देशन दिएको राप्रपाको भनाइ छ ।
यस्तो अवस्थामा पार्टीको कुनै निर्णय वा निर्देशनबिना एमालेका किरण थापालाई मुख्यमन्त्रीमा समर्थन रहेको भन्दै पत्र बुझाइएको भन्दै राप्रपाले त्यसमा पार्टीको सहमति नरहेको जनाएको हो ।
राप्रपाले प्रदेश प्रमुखसमक्ष उक्त पत्रलाई मान्यता नदिन आग्रह गर्दै पार्टीको आधिकारिक निर्णय र निर्देशनअनुसार मात्रै प्रदेशसभामा समर्थन वा मतदानको प्रक्रिया अघि बढ्ने स्पष्ट पारेको छ ।
