काठमाडौं । राष्ट्रिय स्वतन्त्र पार्टी (रास्वपा) को आन्तरिक बैठक लम्बिएपछि सोमबारका लागि बोलाइएको प्रतिनिधिसभाको बैठक निर्धारित समयमा सुरु हुन सकेन ।
दिउँसो १ बजेका लागि तय भएको बैठकअघि रास्वपा सभापति रवि लामिछानेले पार्टीका मन्त्री तथा सांसदहरूसँग सिंहदरबारस्थित संसदीय दलको कार्यालयमा छलफल गरेका थिए । बिहान ११ बजेदेखि सुरु भएको छलफल लामो समयसम्म जारी रहेपछि रास्वपाका सांसदहरू संसद् बैठकमा उपस्थित हुन ढिलाइ भएको हो ।
रास्वपाका प्रमुख सचेतक कवीन्द्र बुर्लाकोटीले पार्टीको आन्तरिक छलफल चलिरहेका कारण प्रतिनिधिसभाको बैठक केही समय सार्न सभामुख डोलप्रसाद अर्यालसँग आग्रह गरेका थिए । रास्वपाका सांसदहरू नै बैठकमा व्यस्त रहेकाले निर्धारित समयमै सदनको कारबाही अघि बढ्न नसकेको बताइएको छ ।
लामिछानेले बोलाएको बैठकलाई रास्वपाभित्र महत्वपूर्ण रूपमा हेरिएको छ । पार्टीका मन्त्री तथा सांसदहरूसँगको छलफलमा समसामयिक राजनीतिक विषय तथा संसदीय गतिविधिबारे छलफल भइरहेको बताइएको छ ।
रास्वपाको आन्तरिक बैठक सकिएपछि प्रतिनिधिसभाको बैठक सञ्चालन हुने अपेक्षा गरिएको छ ।
