काठमाडौँ। विभागीय टोली एपिएफका क्षितिज खनाल र एपिएफकै प्रिन्स दाहाल १४ औं पुष्पलाल स्मृित राष्ट्रिय वरीयता ब्याडमिन्टन प्रतियोगिताको पुरुष एकलमा (शिर्ष आठ वरीयता) मा फाइनलमा प्रवेश गरेका छन् ।
ग्वार्कोस्थित सहआयोजक यल स्पोट्र्स एकेडेमीको कभर्डहलमा आइतबार भएको सेमिफाइनलमा क्षितिजले पिस फिटनेश क्लवका विष्णु कटुवाललाई २–१ ले हराउँदै फाइनलमा पुगेका हुन् ।
क्षितिज विष्णुलाई १८–२१, २१–७, २२–२० ले पराजित गर्दै उपाधिनजिक पुगेका हुन् । अर्को सेमिफाइनलमा नम्बर एक खेलाडी एपिएफका प्रिन्स दाहालले त्रिभूवन आर्मी क्लवका प्रफुल महर्जनमाथि २–१ को जित रचे । प्रिन्सले त्रिभुवन आर्मी क्लबका प्रफुललाई २२–२४, २१–१४, २१–१२ ले हराए ।
यससँग प्रिन्सले यस प्रतियोगितामा दोस्रोपल्ट क्षितिजसँगको भेट पक्का गरे । प्रिन्सले पहिलो खेलमा क्षितिजसँग खेल्दै प्रतियोगिताको शुरुवात गरेका थिए । क्षितिजले लिगको पहिलो खेलमा प्रिन्सलाई २–१ ले पराजित गरेका थिए ।
प्रिन्सलाई फाइनलमा त्यसको बदला लिने अवसर जुरेको छ । क्षितिजलाई भने विजयी यात्रा कायम राख्ने अवसर मिलेको छ ।
नेपाल खेलकुद महासंघअन्तर्गत राष्ट्रिय ब्याडमिन्टन संघको आयोजनामा भएको प्रतियोगिताको महिला एकल (शिर्ष आठ वरीयता) मा आर्मीकी रसिला महर्जन र पुलिसकी शेस्ना श्रीपाली उपाधिका लागि भिड्नेछन् ।
नेपाल नम्बर एक आर्मीकी रसिलाले नेपाल पुलिसकी निता लम्साल माथि २१–१३ , २१–१३ को जित निकालिन् । अर्को खेलमा पुलिसकी शेस्ना श्रीपालीले एपिएफकी रिहाना सेरचनलाई हराउँदै रसिलासँगको भेट पक्का गरिन् ।
शेस्नाले रिहाना माथि २१–१६, २१–१८ को जित निकालेकी हुन् ।–न्युज एजेन्सी नेपाल
