म्याग्दी। म्याग्दीको धवलागिरि गाउँपालिकाले घुम्ती शिविर सञ्चालन गरेर ६०० जनाभन्दा बढी सर्वसाधारणलाई उनीहरू बसेकै ठाउँमा पुगेर सेवा उपलब्ध गराएको छ ।
काठमाडौँ, पोखरा र बेनीमा सञ्चालन भएको घुम्ती शिविरबाट ६०९ जना लाभान्वित भएका हुन् । काठमाडौँमा साउन २४ गते १००, पोखरामा साउन २७ र २८ गते ३५०, बेनीमा २९ र ३० गते सञ्चालन भएको शिविरबाट १५९ जनालाई सेवा उपलब्ध गराएको गाउँ कार्यपालिकाका प्रवक्ता देवेन्द्र रोकाले जानकारी दिनुभयो ।
सामाजिक सुरक्षा भत्ता पाउने लाभग्राहीको नामावली नवीकरण, जन्मदर्ता, नाताप्रमाणित, सिफारिस लगायत सेवा उपलब्ध गराउन घुम्ती शिविर लिएर बजार झरेका जनप्रतिनिधि र कर्मचारी जिल्ला सदरमुकाम बेनीको शिविर सम्पन्न गरेर आज गाउँ फर्किएका छन् ।
ज्येष्ठ नागरिक, अशक्त र असहायलाई लक्षित गरेर उनीहरू बसेकै ठाउँमा पुगेर सामाजिक सुरक्षा भत्ता पाउने लाभग्राहीको नामावली नवीकरण, जन्मदर्ता, नाता प्रमाणित र नागरिकताको सिफारिससम्बन्धी सेवा दिएको रोकाले बताउनुभयो ।
गाउँपालिकामा नाम भए पनि बजारमा बसोबास गर्ने ज्येष्ठ नागरिक, अशक्त, बिरामी लाभग्राहीलाई बर्खामा गाउँसम्म पुग्न कष्ट, झन्झट र दुःख हुने भएकाले जनप्रतिनिधि र कर्मचारी नै सहर झरेकाले सेवा प्राप्त गर्न सहज भएको छ ।
बेनीमा बस्दै आउनुभएकी धवलागिरि गाउँपालिका–३ मुनाकी मनरूपी गर्बुजाले बर्खाका समयमा गाउँमा रहेको वडा कार्यालयमा पुग्दा हुने समय र खर्चको बचतका साथै झन्झट हटेको बताउनुभयो ।
तातोपानीमा बसोबास गर्नुहुने धवलागिरि गाउँपालिका–४ मुदीकी ७५ वर्षीया जसिका पुनले ज्येष्ठ नागरिक र अशक्तलाई शिविरले राहत मिलेको बताउनुभयो ।
गाउँपालिकाका अध्यक्ष प्रेमप्रसाद पुन, उपाध्यक्ष रेशम पुनमगरसहित साथै सातवटै वडाका अध्यक्ष र सचिवहरूले शिविरमा सेवा दिनुभएको छ । धवलागिरिमा करिब तीन हजार जनालाई वार्षिक रु १० करोडभन्दा बढी सामाजिक सुरक्षा भत्ता वितरण हुने गरेको छ ।
सेवा, सुविधा र अवसरका लागि सहरबजारमा बसोबास गरे पनि औपचारिक रूपमा बसाइँसराइ गर्ने अवस्था नआओस भनेर घुम्ती शिविरमार्फत बसेकै ठाउँमा पुगेर सेवा उपलब्ध गराउने अभ्यास गरिएको गाउँपालिकाका अध्यक्ष पुनले बताउनुभयो । रासस
