काठमाडौँ। नेपाली काँग्रेसका पूर्वउपसभापति विजयकुमार गच्छदारले पार्टीभित्रको आन्तरिक कलह अन्त्य गरी संगठनलाई एकतावद्ध बनाउने जिम्मेवारी नेतृत्व र दोस्रो पुस्ताका नेताहरूको काँधमा आएको बताउनुभएको छ ।
संस्थापन इतर समूहद्वारा आयोजित राष्ट्रिय भेलालाई सम्बोधन गर्दै नेता गच्छदारले पार्टी पूर्वसभापति शेरबहादुर देउवा र सभापति गगन थापा लगायतका नेताहरूलाई जिम्मेवार बन्न आग्रह गर्नुभयो ।
आफ्नो सम्बोधनका क्रममा गच्छदारले पूर्वसभापति देउवालाई गुटबन्दीभन्दा माथि उठेर अभिभावकीय भूमिका निर्वाह गर्न सुझाव दिनुभयो । नेता गच्छदारले १६ बुँदे सहमतिको स्मरण गर्दै वर्तमान संविधान निर्माणमा आफ्नो भूमिका महत्वपूर्ण रहेको दाबी गर्नुभयो।
आफू संविधानको मस्यौदा तयार गर्ने प्रमुख हस्ताक्षरकर्तामध्ये एक रहेको उल्लेख गर्दै उहाँले आफूलाई कानून, नीति र सिद्धान्तको पूर्ण ज्ञान रहेको स्पष्ट पार्नुभयो । कार्यक्रममा डा. शशांक कोइराला, शेखर कोइराला र सभापति देउवाको उपस्थितिलाई संकेत गर्दै उहाँले नेतृत्व तहमा कोइराला परिवार र देउवाको सहकार्यलाई उचित स्थानको ग्रहण भनी टिप्पणी गर्नुभयो ।
उहाँले भन्नुभयो, ‘तपाईं पार्टीको मात्र नभई देशकै नेता हुनुहुन्छ । राजनीतिमा व्याप्त विसंगति र डर्टी गेम (फोहोर खेल) बाट मुक्त गर्दै देश र पार्टीको हितका लागि तपाईंले आफूलाई व्यक्ति र समूहभन्दा माथि उठाउन आवश्यक छ। तपाईंले चाहेमा पार्टीको विवाद टुंगो लाग्न सक्छ ।’
युवा नेताहरूतर्फ लक्षित गर्दै गच्छदारले नेतृत्वमा आएका युवा पुस्ताले संवेगात्मक र भावनात्मक पक्षलाई बुझेर अघि बढ्नुपर्नेमा जोड दिनुभयो । सभापति गगन थापाले केही समयअघि व्यक्त गरेको करुणा शब्दको चर्चा गर्दै उहाँले राजनीतिमा दया र मानवीय संवेदनाको महत्व हुने बताउनु भयो ।
नेता गच्छदारले पार्टीभित्रका पुराना र नयाँ पुस्ताबीच समन्वय हुनुपर्ने र नेतृत्वले सबैलाई समेटेर लैजानु नै वर्तमानको आवश्यकता रहेको जिकिर गर्नुभयो ।–न्युज एजेन्सी नेपाल
