मंगलबारदेखि सुरु भएको ‘नाइमा नेपाल मोबिलिटी एक्स्पो २०२६’ को उद्घाटन समारोहलाई सम्बोधन गर्दै अध्यक्ष पाण्डेले अटोमोबाइल क्षेत्र उद्योग, व्यवसाय, प्रविधि र उपभोक्तालाई जोड्ने महत्वपूर्ण मञ्च भएको बताउनुभयो ।
उहाँले अटोमोबाइल तथा मोबिलिटी क्षेत्र सरकारलाई महत्वपूर्ण राजस्व योगदान गर्ने र ठूलो रोजगारी सिर्जना गर्ने क्षमता भएको क्षेत्र रहेको उल्लेख गर्नुभयो । यो क्षेत्र निर्माण, पूर्वाधार, ऊर्जा, वित्तीय सेवा, बीमा, पर्यटन तथा यातायातजस्ता क्षेत्रसँग प्रत्यक्ष रूपमा जोडिएकाले यसको विकासले समग्र अर्थतन्त्रमा सकारात्मक प्रभाव पार्ने उहाँको भनाइ थियो ।
पछिल्ला केही वर्षदेखि नेपालको अर्थतन्त्र अपेक्षाअनुसार अघि बढ्न नसकेको र आर्थिक मन्दीको असर निजी क्षेत्रसँगै सरकारी राजस्व, रोजगारी, उत्पादन, व्यापार तथा समग्र आर्थिक गतिविधिमा परेको उहाँले बताउनुभयो । पछिल्लो समय अर्थतन्त्रमा देखिन थालेका सकारात्मक गतिविधि भने स्वागतयोग्य रहेको उहाँले उल्लेख गर्नुभयो ।
चालु आर्थिक वर्षका लागि सरकारले राखेको ७ प्रतिशत आर्थिक वृद्धिको लक्ष्य हासिल गर्न पुँजीगत खर्च उल्लेखनीय रूपमा बढाउनुपर्नेमा पाण्डेले जोड दिनुभयो । पुँजीगत खर्च बढ्दा सडक, पुल, ऊर्जा, यातायात तथा सहरी पूर्वाधारको विकास तीव्र हुने र त्यसको सकारात्मक प्रभाव अर्थतन्त्रका अन्य क्षेत्रमा समेत पर्ने उहाँले बताउनुभयो ।
‘अटोमोबाइल एक्स्पोहरू व्यापार प्रवद्र्धनका माध्यम मात्र होइनन् । यिनले उपभोक्ताको विश्वास बढाउने, नयाँ प्रविधि भित्र्याउने तथा विद्युतीय र हरित मोबिलिटीलाई प्रोत्साहन गर्दै अर्थतन्त्रलाई चलायमान बनाउन सहयोग गर्छन्,’ उहाँले भन्नुभयो ।
युवा जनशक्तिको विदेश पलायन रोक्न उद्योग, पूर्वाधार, सूचना प्रविधि, हरित ऊर्जा, पर्यटन, कृषि प्रशोधन तथा मोबिलिटी क्षेत्रमा लगानी विस्तार गर्नुपर्ने उहाँले बताउनुभयो । यस्ता क्षेत्रमा लगानी बढाउन सके स्वदेशमै ठूलो संख्यामा गुणस्तरीय रोजगारी सिर्जना गर्न सकिने उहाँको भनाइ थियो ।
निजी क्षेत्रको विस्तार र औद्योगिकीकरणलाई प्रोत्साहन गर्न स्थिर सरकार, नीतिगत स्थिरता, कानुनी सुधार तथा लगानीमैत्री वातावरण आवश्यक रहेको पाण्डेले बताउनुभयो । उत्पादनमूलक तथा पूर्वाधार क्षेत्रमा दिगो लगानी बढाउन सके नेपालको दीर्घकालीन आर्थिक रूपान्तरण, रोजगारी सिर्जना र समृद्धिको आधार बलियो बन्ने उहाँले उल्लेख गर्नुभयो ।
उहाँले ‘नाडा नेपाल मोबिलिटी एक्स्पो २०२६’ ले व्यापार प्रवद्र्धनसँगै नयाँ प्रविधिबारे उपभोक्तालाई जानकारी गराउने, बजारमा विश्वास बढाउने तथा विद्युतीय र हरित मोबिलिटीको प्रवद्र्धनमा महत्वपूर्ण योगदान गर्ने विश्वास व्यक्त गर्नुभयो ।
