काठमाडौँ । सत्तारुढ दल राष्ट्रिय स्वतन्त्र पार्टी (रास्वपा)की सांसद लिमा अधिकारीले एलपी ग्यासको अभावबाट नागरिकले भोगिरहेको सास्ती अन्त्य गर्न तत्काल इन्डक्सन चुल्हो वितरणको योजना ल्याउन सरकारसँग माग गर्नुभएको छ ।
प्रतिनिधि सभाको सोमबारको बैठकमा बोल्दै सांसद अधिकारीले खाना पकाउने ग्यासका लागि सर्वसाधारण मध्यरातसम्म लाइनमा बस्नुपर्ने अवस्था अन्त्य गर्न सरकारको ध्यानाकर्षण गराउनुभएको हो ।
उहाँले एकातिर देशमा विद्युत खेर गइरहेको र अर्कोतिर खाना पकाउने ग्यासका लागि नागरिकले घण्टौँ लाइनमा बस्नुपर्ने अवस्था रहेको भन्दै वैकल्पिक ऊर्जाको प्रयोगमार्फत समस्या समाधान गर्नुपर्ने बताउनुभयो ।
सांसद अधिकारीले ग्यास आपूर्तिमा पटक–पटक समस्या देखिए पनि विद्युत् खपतसम्बन्धी नीतिले वैकल्पिक इन्धनको प्रयोगलाई निरुत्साहित गरिरहेको हो कि भन्ने विषयमा समेत सरकार गम्भीर हुनुपर्ने बताउनुभयो ।
उहाँले भन्नुभयो, ‘भान्सामा साँझ र बिहानको छाक टार्न धौधौ परेका सर्वसाधारण नागरिक खाली ग्यास सिलिन्डर बोकेर मध्यरातसम्म लाइनमा बस्न बाध्य छन् । आखिर नागरिकले यस्तो सास्ती कहिलेसम्म भोगिरहनुपर्ने हो सरकार ? एकातिर देशमा बिजुली खेर गइरहेको छ, अर्कोतिर ग्यासकै लागि नागरिकलाई मध्यरातसम्म लाइनमा उभ्याइएको छ । योभन्दा ठूलो विडम्बना अरू के हुनसक्छ ?’
ग्यासको अभावबाट नागरिकलाई राहत दिन सरकारले तत्काल ग्यासका लागि लाइन बस्ने अवस्थाको अन्त्य गर्दै इन्डक्सन चुल्हो वितरण गर्ने योजना ल्याउनुपर्ने उहाँको भनाइ छ ।
ग्यास आपूर्तिमा पटक–पटक समस्या भइरहँदा पनि विद्युत् खपतमा लगाइएका नीतिहरूले वैकल्पिक इन्धनको प्रयोगलाई कतै निरुत्साहित गरिरहेको त छैन भन्ने प्रश्न गर्दै सांसद अधिकारीले यस विषयमा सरकार गम्भीर बन्नुपर्ने बताउनुभयो ।
उहाँले नागरिकले एलपी ग्यासका लागि अझै कति सास्ती भोग्नुपर्ने हो भन्दै सरकारसँग प्रश्नसमेत गर्नुभयो।
