कुवेत सिटी। कुवेतका अधिकारीहरूले स्थानीय इरानी विद्यालय बन्द गर्न आदेश दिएका छन् ।
शिक्षा मन्त्रालयको एक स्रोतले बिहीबार एएफपीलाई यसबारे जानकारी दिएको हो । यो आदेश मध्यपूर्व युद्धका क्रममा इरानले कुबेतमा बारम्बार आक्रमण गरेपछि आएको हो ।
मन्त्रालय स्रोतले देशको एक मात्र इरानी विद्यालय बन्द गर्नुको कारण स्पष्ट पारेको छैन । यद्यपि युएईमा युद्ध सुरु हुँदा अधिकारीहरूले इरानी सरकारसँग सम्बन्धित ठानेका विद्यालय र अस्पतालविरुद्ध यस्तै कदम चालिएको थियो । खाडी मुलुकले द्वन्द्वका क्रममा तेहरानको आक्रमणको मुख्य भार बेहोरेका छन् ।
अमेरिका र इरानबिचको युद्धविराम भङ्ग भएपछि पछिल्ला हप्तामा कुवेत र बहराइन विशेषरूपमा प्रभावित भएका छन् । कुवेतमा विद्युत र ‘डिसेलिनेसन’ प्लान्टमा बारम्बार आक्रमण भएपछि अधिकारीहरूले गत महिना बासिन्दालाई बिजुलीको बचत गर्न आग्रह गरेका थिए ।
“शिक्षामन्त्रीले निजी इरानी विद्यालयको शैक्षिक इजाजतपत्र रद्द गरी बन्द गर्ने निर्णय जारी गर्नुभएको छ,” एएफपीले पूाप्त गरेको विद्यालय बन्द गर्न दिइएको निर्णयको लेखिएको छ ।
“आगामी शैक्षिक वर्षका लागि नयाँ भर्ना स्थगित गरिएको छ र मन्त्रालयले अभिभावकलाई आफ्ना छोराछोरीलाई अन्य विद्यालयमा स्थानान्तरण गर्न आग्रह गरेको छ,” निर्णयमा भनिएको छ ।
कुबेती कर्मचारी तथा इरानी समुदायका सदस्यका अनुसार मार्चमा युएईले दुबईमा रहेको इरानसँग सम्बन्धित एक अस्पताल बन्द गर्न आदेश दिएको थियो र कम्तीमा चार इरानी विद्यालय पनि बन्द गरिएका थिए ।
“इरानी शासन र आइआरजीसीसँग प्रत्यक्षरूपमा सम्बन्धित केही संस्था लक्षित कदमअन्तर्गत केही संस्था बन्द गरिने छन्,” युएईका एक अधिकारीले त्यति बेला एएफपीलाई बताउनुभएको थियो । तिनीहरूले युएईका कानुन उल्लङ्घन गरेको पाइएको बताइएको थियो । रासस/एएफपी
