काठमाडौं । नेकपा (एमाले) का महासचिव शंकर पोखरेलले आफ्नो पार्टी र नेतृत्वमाथि लगाइएका भ्रष्टाचारका आरोप प्रमाणित गरेर देखाउन सरकारलाई चुनौती दिनुभएको छ ।
शुक्रवार काठमाडौंमा आयोजित एक कार्यक्रमलाई सम्बोधन गर्दै महासचिव पोखरेलले राजनीतिक प्रतिशोधका आधारमा एमालेलाई बदनाम गर्ने प्रयास भइरहेको दाबी गर्नुभयो । उहाँले यती होल्डिङ्स, ओम्नी र गिरिबन्धु टी–स्टेटलगायतका प्रकरणमा एमालेलाई अनावश्यक रूपमा मुछिएको जिकिर गर्नुभयो ।
आर्थिक लेनदेन नै नभएको विषयमा भ्रष्टाचार कसरी हुन्छ भन्दै उहाँले कतिपय विषयमा नीतिगत निर्णय मात्र भएको र कतिपयमा नीति निर्माणको प्रक्रिया समेत सुरु नभएको अवस्थामा पार्टीलाई बदनाम गर्ने प्रयास भइरहेको बताउनुभयो ।
महासचिव पोखरेलले एमाले अहिले सरकारमा नरहेको भन्दै आरोप पुष्टि गर्न सरकारलाई चुनौती दिनुभयो । प्रमाण भए कानुनअनुसार कारबाही गर्न आफ्नो पार्टीलाई कुनै आपत्ति नरहेको उहाँको भनाइ थियो ।
उहाँले राजनीतिक प्रतिशोधका आधारमा एमालेका नेताहरूलाई दुःख दिने काम भइरहेको आरोप लगाउँदै पार्टी अध्यक्षलाई १३ दिन र उपाध्यक्ष विष्णु पौडेललाई २५ दिन हिरासतमा राखिए पनि कुनै प्रमाण जुटाउन नसकिएको र मुद्दा दर्ता हुन नसकेको दाबी गर्नुभयो ।
‘हामीले गल्ती गरेका कारण होइन, राजनीतिक आरोपका कारण बदनाम हुने प्रयास भएको हो । आरोप धेरै लगाइए पनि प्रमाणित हुन सकेका छैनन्,’ उहाँले भन्नुभयो, ‘अहिले सरकार उनीहरूकै भएकाले यदि प्रमाण छ भने कानुनी कारबाही गरेर देखाउन सक्नुपर्छ ।’
महासचिव पोखरेलले व्यक्तिगत रूपमा कुनै नेता–कार्यकर्तामा कमजोरी हुन सक्ने भए पनि समग्रमा एमाले इमानदार कार्यकर्ताहरू भएको पार्टी रहेको दाबी गर्नुभयो । गल्ती गर्ने जोसुकैलाई कानुनअनुसार कारबाही हुनुपर्ने पक्षमा एमाले रहेको उहाँले स्पष्ट पार्नुभयो ।
नेपालका राजनीतिक दलहरूमध्ये एमालेमा सबैभन्दा बढी इमानदार नेता तथा कार्यकर्ता रहेको दाबी गर्दै उहाँले सुशासन र जवाफदेहिताको प्रश्नमा पार्टी जुनसुकै परिस्थिति सामना गर्न तयार रहेको बताउनुभयो ।
महासचिव पोखरेलले एमालेका नेता तथा कार्यकर्तालाई पार्टीको स्वच्छ छवि र सुशासनप्रतिको प्रतिबद्धता लिएर जनतामाझ जानसमेत आग्रह गर्नुभयो।
