काठमाडाैँ । झापाकाे भद्रपुर नगरपालिका–४ स्थित आफ्नै बारीमा हात्ती धपाउन लगाइएको नाङ्गो विद्युतीय तार छोएपछि करेन्ट लागेर एक महिलाको मृत्यु भएको छ । जिल्ला प्रहरी कार्यालय झापाका सूचना अधिकारी रञ्जन अवाका अनुसार स्थानीय लाखबहादुर लिम्बूकी श्रीमती अन्दाजी ६५ वर्षीया सनज्योति लिम्बूको मृत्यु भएको छ ।
आज बिहान करिब ९ः०० बजे भएको उक्त घटनामा उहाँको करेन्ट लागेर घटनास्थलमै मृत्यु भएको हो । बुहारी सविता खड्काले करेन्ट लागेर लडिरहेको अवस्था देखेपछि बिहान करिब ११ः०० बजे प्रहरीचौकी महेशपुरमा खबर गर्नुभएको थियो । सूचनाप्राप्त हुनासाथ प्रहरी निरीक्षक विशाल श्रेष्ठको कमाण्डमा प्रहरी टोली घटनास्थल पुगेको थियो । प्रहरीे पुग्दा लिम्बूको मृत्यु भइसकेको थियो ।
घटनाका सम्बन्धमा थप अनुसन्धान भइरहेको प्रहरीले जनाएको छ । यसैबीच यहाँकोे मेचीनगर नगरपालिका–१० नागरडुब्बा एक घरमा फ्रिजको तार सर्ट भएर आगलागी हुँदा करिब रु दुई लाख ५० हजार बराबरको धनमाल क्षति भएको छ । जिल्ला प्रहरी कार्यालय झापाका सूचना अधिकारी तथा प्रहरी नायब उपरीक्षक रञ्जन अवाका अनुसार आज बिहान स्थानीय लाल मोहम्मदको भान्सा कोठामा रहेको फ्रिजको तार सर्ट भई आगलागी भएको हो ।
आगलागीबाट फ्रिज, डाइनिङ टेबल, भाँडावर्तन, चामल, मिटर बक्स तथा अन्य घरायसी सामग्री जलेर नष्ट भएको प्रहरीले जनाएको छ । घटनामा कुनै मानवीय वा चौपाया क्षति भने भएको छैन । स्थानीयवासी, नेपाल प्रहरी तथा मेचीनगर नगरपालिकाको दमकलको संयुक्त प्रयासमा आगो नियन्त्रणमा आएको प्रहरी नायब उपरीक्षक अवाले जानकारी दिनुभयो । प्रहरीका अनुसार आगलागीबाट भएको क्षतिको थप विवरण सङ्कलन भइरहेको छ ।
