काठमाडौं । वैदेशिक रोजगार ठगीसम्बन्धी करिब २५ वर्षदेखि विभागमा थन्किएर रहेका हजारौँ मुद्दा तथा अनुसन्धान फायल खोजी, व्यवस्थापन तथा डिजिटलाइज गर्ने कामलाई वैदेशिक रोजगार विभागले तीव्रता दिएको छ।
युवा, श्रम तथा रोजगार मन्त्री रामजी यादवको विशेष चासो र विभागका महानिर्देशक मिरा आचार्यको नेतृत्वमा लामो समयदेखि अलपत्र रहेका मुद्दा तथा अनुसन्धानसम्बन्धी फायलहरू व्यवस्थित गर्ने अभियान अघि बढाइएको विभागले जनाएको छ। मन्त्री यादवले मुद्दा तथा अनुसन्धानलाई पहिलो प्राथमिकतामा राख्दै यसलाई प्रभावकारी बनाउन विभागलाई निरन्तर सक्रिय रहन निर्देशन दिँदै आएका छन्।
वि.सं. २०४२ सालमा वैदेशिक रोजगार ऐन जारी भएपछि श्रम विभागको कार्यक्षेत्र विस्तार गरिएको थियो। त्यसपछि वि.सं. २०५६ सालमा श्रम तथा रोजगार प्रवर्द्धन विभाग स्थापना भएसँगै वैदेशिक रोजगारीमा जाने नेपाली श्रमिकका गुनासा दर्ता हुने व्यवस्था सुरु भएको थियो। वि.सं. २०६४ सालमा वैदेशिक रोजगार विभाग गठन भएपछि वैदेशिक रोजगारसम्बन्धी सम्पूर्ण कार्य विभागमार्फत सञ्चालन हुँदै आएको छ।
विभागका अनुसार अभिलेख व्यवस्थापनका क्रममा वि.सं. २०५७ सालदेखिका मुद्दा तथा अनुसन्धानसम्बन्धी महत्वपूर्ण फायलहरू समेत फेला परेका छन्। करिब २५ वर्षदेखि डम्प अवस्थामा रहेका हजारौँ फायल खोजी गरी सालवसाली रूपमा भौतिक अभिलेख तयार गर्ने काम सम्पन्न भइसकेको छ।
हाल ती फायलहरूको स्क्यानिङ गरी डिजिटल प्रतिलिपि तयार गर्ने कार्य पनि तीव्र गतिमा भइरहेको विभागले जनाएको छ। आगामी दिनमा मुद्दा तथा अनुसन्धान प्रक्रियालाई अझ प्रभावकारी, पारदर्शी र सहज बनाउन डिजिटल ट्र्याकिङ प्रणाली विकास गर्ने तयारी समेत गरिएको छ।
विभागले वि.सं. २०५७ सालदेखि उपलब्ध सबै मुद्दा तथा अनुसन्धानसम्बन्धी फायलहरूको विवरण डिजिटल प्रणालीमा अद्यावधिक गरी न्याय सम्पादन प्रक्रियासँग आबद्ध गर्ने योजना बनाएको छ। यसबाट लामो समयदेखि न्यायको प्रतीक्षामा रहेका वैदेशिक रोजगार ठगीका पीडितले छिटो, पारदर्शी र प्रभावकारी सेवा पाउने अपेक्षा गरिएको विभागको भनाइ छ।
