महेन्द्रनगर। कञ्चनपुरको भीमदत्त नगरपालिका-१२ स्थित महाकाली नदीमा निर्माण भएको चार लेनको पक्की पुलको उत्तरतर्फको ड्याम (गाइडबण्ड) पुनःनिर्माणमा नेपाली सेनाले गति दिएको छ ।
सङ्घीय सरकारको आग्रहपछि एक साता अघिदेखि गाइडबण्ड संरक्षणका लागि पुनःनिर्माणमा जुटेका सेनाले सुदूरपश्चिम पृतना र अन्यत्र पृतनाबाट जनशक्ति थप गरिएको श्री नं २५ बाहिनी अड्डा भगतपुर ब्यारेकले जनाएको छ ।
साथै उक्त पुनःनिर्माण गरी तटीय क्षेत्रमा बाढीका बेला हुनसक्ने सम्भावित क्षति तथा विपद् न्युनीकरण गर्न सेनाले सैनिक अधिकारीलाई विभिन्न जिम्मेवारी दिएको छ । आज सेनाले गरिरहेको कामको प्रगति विवरणसहित अवलोकनका लागि सुदूरपश्चिम पृतनाका पृतनापति उपरथी किरण केसीसहित सैनिक अधिकारी निर्माणस्थल पुग्नुभएको छ । नेपाली सेनाले पुनःनिर्माणका लागि जनशक्तिका लागि कुनै समस्या नरहेको जनाएको छ ।
“थप जनशक्ति आउने क्रम पनि जारी छ”, सेनाले भनेको छ, “प्राविधिकसहितको टोली यहाँ खटिएर धमाधम निर्माण अघि बढाइरहेको छ ।” सेनालाई सडक डिभिजन कार्यालय कञ्चनपुरले मेसिनरी सहयोग गरेको छ । यहाँ गत वर्ष आएको बाढीले करिब ३०० मिटर गाइडबण्डको मुनिको भागमा क्षति पुर्याएको थियो । गत वर्षको वैशाखमा सरकारले महाकाली पुल आयोजनालाई तीन महिनाका लागि सङ्कटग्रस्त क्षेत्र घोषणा गरी गाइडबण्ड निर्माण गरी भीमदत्त नगरपालिका क्षेत्रका तटीय बस्ती जोगाउन काम नेपाली सेनालाई दिएको थियो ।
सरकारले वर्षातका बेला सो क्षेत्रमा हुन सक्ने सम्भावित क्षति न्युनीकरणका लागि पुनः नेपाली सेनालाई उक्त जिम्मेवारी दिएको हो । बाहिनीले आयोजनास्थलमा तत्कालको क्षति न्युनीकरण गरी थप क्षति हुन नदिन, चार लेनको पुल संरक्षण तथा तटीय क्षेत्रको बस्ती जोगाउन पुनःनिर्माणलाई तीव्र पारिएको जनाएको छ ।
नेपाली सेनाले उक्त पुनःनिर्माणको संयोजनको जिम्मेवारी सेनाकातर्फबाट श्री नं २५ बाहिनी अड्डाका बाहिनीपति सहायकरथी बिजितराज रेग्मीलाई दिएको छ भने केन्द्रबाट पनि एक जना प्राविधिक प्रमुख सेनानीलाई महाकालीमा खटाएका छन् ।
पक्की पुलको ९५ प्रतिशत निर्माण सकिएपनि गाइडबण्डको नयाँ डिजाइन स्वीकृती र भेरियसन अर्डर (भिओ)को विषय किनारा नलागेपछि निर्माण कम्पनी कामबाट गत वर्षदेखि बाहिरिएको थियो । रासस
