काठमाडौँ । राष्ट्रिय स्वतन्त्र पार्टी (रास्वपा) ले आफ्नो पहिलो ऐतिहासिक राष्ट्रिय महाधिवेशनलाई व्यवस्थित, निष्पक्ष र पारदर्शी रूपमा सम्पन्न गर्न २२ सदस्यीय निर्वाचन समिति गठन गरेको छ ।
पार्टीको केन्द्रीय निर्वाचन आयोगले सार्वजनिक गरेको सूचनाअनुसार महाधिवेशनका लागि आवश्यक सांगठनिक संरचना तयार पारिएको छ। सोअनुसार १० सदस्यीय केन्द्रीय निर्वाचन आयोग र त्यसअन्तर्गत १२ सदस्यीय ‘राष्ट्रिय महाधिवेशन निर्वाचन समिति–२०८३’ गठन गरिएको हो ।
केन्द्रीय निर्वाचन आयोगको प्रमुखमा भुवन केसी र उपप्रमुखमा डा. राम गुरुङ रहेका छन् । आयोगका सदस्यहरूमा कुमार आनन्द मिश्र, नारायण प्रसाद प्याकुरेल, सुमित्रा पण्डित, गोकुल सापकोटा, निश्चल सिंह भण्डारी, बिपी दाहाल, सौरेन्द्र बहादुर शाह र सुदन प्रसाद ज्ञवाली रहेका छन् ।
यसैगरी, महाधिवेशनको प्रत्यक्ष सञ्चालनका लागि गठित निर्वाचन समितिमा वीरेन्द्र केएम, गणेशदत्त भट्ट, डा. दिनेश महतो, आयुष्मा अर्याल, भूपेन्द्रराज बस्नेत, मिलन कार्की, सार्थक भट्टराई र रामकुमार खतिवडा सदस्यका रूपमा चयन भएका छन् । समितिको कार्यसम्पादनमा सहयोग गर्न चार जना निर्वाचन कर्मचारी समेत तोकिएका छन्, जसमा शुभराज शिल्पकार, सेनु लामा तामाङ, राजेन्द्र कुमार श्रेष्ठ र मुकेश झा रहेका छन् ।
केन्द्रीय निर्वाचन आयोगका प्रमुख भुवन केसीले महाधिवेशनलाई ऐतिहासिक बनाउने र निर्वाचन प्रक्रियालाई पूर्ण रूपमा लोकतान्त्रिक पद्धतिबाट सम्पन्न गर्न यो समितिले महत्वपूर्ण भूमिका खेल्ने बताएका छन् । रास्वपाको महाधिवेशन आइतबारदेखि चितवनमा सुरु भएको छ ।
