काठमाडौं । नेकपा एमालेका अध्यक्ष केपी शर्मा ओलीले पार्टीभित्र ‘शिर काटेर टेबलमा राखे पार्टी सुध्रिन्छ’ भन्ने मानसिकता पार्टी हितमा नरहेको बताएका छन्। उनले वर्तमान परिस्थितिमा पार्टीभित्र मजबुत एकता आवश्यक रहेकोमा जोड दिएका छन्।
पार्टीको संगठन विभागद्वारा आयोजित ‘सदस्यता नवीकरण, विस्तार तथा उत्प्रेरणा’ कार्यक्रमलाई सम्बोधन गर्दै अध्यक्ष ओलीले केही नेताहरूले पार्टी सुधारका नाममा विभाजनकारी अभिव्यक्ति दिने गरेको बताए।
“शिर काटेर टेबलमा राखिदिने हो भने जीउ मात्रै भएर पार्टी एकता हुँदैन, यस्तो मानसिकता पार्टी हितमा छैन,” उनले भने।
अध्यक्ष ओलीले विपक्षीबाट पार्टीमाथि निरन्तर हमला भइरहेका बेला पार्टीभित्रकै केही नेता तथा केही सञ्चारमाध्यमले समेत पार्टीविरुद्ध नकारात्मक वातावरण सिर्जना गरेको आरोप लगाए।
“कोही एता फर्केर बोल्ने, कोही उता फर्केर बोल्ने, पार्टीविरुद्ध भ्रम फैलाउने प्रवृत्ति देखिएको छ,” उनले भने, “समीक्षा गर्नुपर्छ भन्ने तर समीक्षा नै नहुँदै कोही हस्ताक्षर गर्न कुद्ने, कोही अनेक भ्रम फैलाउँदै हिँड्ने प्रवृत्तिले पार्टी एकताबद्ध हुन सक्दैन।”
उनले एमाले ३६ वर्षदेखि जनताको बहुदलीय जनवादको सिद्धान्तमा एकताबद्ध रहँदै आएको उल्लेख गर्दै सबै नेता–कार्यकर्ताले सोही आधारमा अघि बढ्नुपर्ने बताए।
दुई दिने उक्त कार्यक्रम आजदेखि सुरु भएको हो र भोलिसम्म सञ्चालन हुनेछ। कार्यक्रममा अध्यक्ष ओलीले पार्टी संगठन, एकता र कार्यकर्ता परिचालनका विषयमा धारणा राखिरहेका छन्।
