काठमाडौं । काठमाडौंमा जारी काभा महिला भलिबल च्याम्पियनसिपमा आज दुवै सेमिफाइनल खेलहरू हुँदैछन् ।
त्रिपुरेश्वरस्थित दशरथ रङ्गशाला कभर्डहलमा हुने सेमिफाइनल खेलमा घरेलु टोली नेपालले इरानको सामना गर्नेछ ।
८ टोली सहभागी यस च्याम्पियनसिपको सेमिफाइनल जित्ने दुई टोलीहरू शुक्रबार हुने फाइनलमा पुग्नेछन् । नेपाल भलिबल सङ्घका अनुसार यस च्याम्पियनसिपको विजेता टोली आगामी एसियन कपका लागि छनोट हुनेछ ।
समूह ‘बी’ को विजेता इरान र समूह ‘ए’ को उपविजेता नेपालबिचको दोस्रो सेमिफाइनल खेल आज साँझ ५ बजे सुरु हुनेछ । इरान समूह चरणमा आफ्ना तीनवटै खेल सोझो सेटमा जित्दै अपराजित बनेर सेमिफाइनल पुगेको टोली हो । यता, नेपालले भने समूह चरणमा दुई खेलमा जित निकाल्दा एक खेलमा भारतसँग पराजय बेहोरेको थियो ।
यसअघि सन् २०२४ मा काठमाडौँमै भएको प्रतियोगितामा नेपाल र इरानबिच दुई खेल भएका थिए, जसमा दुवै टोलीले एक-एक खेल जितेका थिए ।
आजै दिउँसो २:३० बजे हुने पहिलो सेमिफाइनल खेलमा समूह ‘ए’ को विजेता भारत र समूह ‘बी’ को उपविजेता काजखस्तान भिड्दै छन् । भारत समूह चरणमा ३ वटै खेल जितेर अपराजित रहँदै सेमिफाइनल पुगेको हो । भारत सन् २०२४ मा काठमाडौंमै भएको यस च्याम्पियनसिपको पहिलो संस्करणको विजेता समेत हो ।
अर्कोतर्फ, काजखस्तान यस च्याम्पियनसिप खेल्ने टोलीहरूमध्ये सबैभन्दा माथिल्लो वरीयतामा रहेको टिम हो, जसले समूह चरणमा दुई खेल जित्दा एक खेलमा हार बेहोरेको थियो ।
